Иесиди акьул гузва мугьмандиз 32

Йиф хъфена, чигеди кьур дагъларай.
Югъ я гвайди жуьрба-жуьре хабарар...

Нурар гваз рагъ кук1ушдилай алатна;
Яваш-яваш хуьрни кимел акъатна.

Къунши хуьряй атанва мад мугьманар,
Кимин юкьвал къугъвазва пагьливанар.

Акъажнариз, румар гузва сад-садаз;
Хъсан са мал гьазурнава зурбадаз.

Къунши хуьряй атанвай са ашукьни
К1вале ава са маса са ашукьдин.

Уст1арризни ава сирер, савдаяр-
Ашукьрихъни чпиз талукь къайдаяр...

Са уст1ардин къимет бегьем вине я-
Муькуьди, гьак1, т1варц1ел алай пине я.

Пине, бегьем акьулдикай пай тахьай,
Къекъведа вич са зат1дай кьаз, тай тахьай.

Вичин муквал ам жеда са агъа хьиз,
Алатайла, ахпа жеда къакъа из.

Амалдарвал вичин асул-бине я-
Эвел-эхир, куьтягь тежер фитне я.

Ацукьнава кьве ашукьни мез-гъвелиз,
Сада-садаз гагь тариф, гагь ишелиз.

Иесиди тарсар гузва мугьмандиз;
Гьар келима ухшар я са бугьтандиз.

К1венк1ве хьана ам накь хьайи гъавгъадин-
Нивай жеда рабатвал гил лавгъадин?

Лавгъадихъ яб акалайди усал я-
Лавгъачидиз аквада вич кьегьал яз.

Хатур хадач, абурни чи дустар я-
Гагь чаз ухшар я, гагь акси-къаншар я.

Ужуз савдаяр арада гзаф я,
Ужузвиляй адан бине хилаф я.

Лугьузвап:" Дуст, ахъайда, ваз чир хьурай,
Ин ихтилат масадбуруз сир хьурай.

Накь гъалибвал къачуна за атайдал,
Лугьун за ваз гьар са кьиса авайвал.

Муминаз за ганай хъсан жавабар,
И кар адаз агъур я, зи гьисабай.

Гил суалар вугудай ви нубат хьуй,
Вахъни хъсан, гьа захъ хьтин къамат хьуй.

Чи кьведанни уст1арвилин т1вар жеда,
Имни хъсан, кутугай са кар жеда".

Иесиди мугьман твазва гъавурда,
Ширин сесер акъудиз гагь чунгурдай.

" И пуд суал вуна адав вугайт1а,
Зурба кас я ам, жавабар жагъайт1а".

Дуьз жавабар гайи ашукь вине я,
Пара гагьда амукьда ам чешне яз.

Тикрар хьайи суалар низ герек я-
Къимет чпин, лап вини кьил кепек я.

Гьар суалдихъни мана-метлеб ава,
Дуьз лагьайт1а, тербия-эдеб ава.

Жавабар дуьз гайидазни хийир я,
Са бязибур, яб гайила гишир я.

Герек яни намус авай кьегьалдиз
Яб акалун акьул кьери качалдихъ.

Ибурун мах- буш гафарин хъалхъам я,
Яб гайит1а, куьтягь тежер рахъам я.

Фенд къурмишиз алахънава иеси,
Ширин я лап вирт1едилайни сесни.

К1ант1а накьан тикрар ая суалар,
К1ант1а жувал алук1 кьац1ай парталар.

Са гафар я, къаматни лап кепек я.
Фикирзава гадади, вич эркек я.

Жавабарни мад хьайит1а тикрариз,
Жемят къвазда Муминални хъуьрариз.

Айиб мийир! Мягьтел хьана, алк1анва,
Кьил акъат тийиз, фикирри тухванва.

Зазни ихьтин акунай гьа кьегьалар,
Алук1на хьиз галстук авай парталар.

Югъди-йифди чарадакай фитне из
Вахт рекьизвай, алчах амал вине из.

Менфят ят1а, лал жеда зун, сабурда;
Белки гьатда зун абурун гъавурда.

Хийир тушт1а, валлагь имай са т1ул я,
Алчах гьайван, лап виринал бат1ул я.

Сацин хъиляй жуван япар т1акьуриз,
Алай т1варни, арха-марха кьац1уриз.

Я гьайван! Гьайиф зи къелем эхзавай;
Яб гайит1а, яваш-яваш шехьзавай.

Язух хьана заз камаллу къелемдин.
Герек туш чаз ихьтин гьич са этемни.

Са лашанай кьве къуьр ягъиз к1ан ят1а,
Фикир ая, види гьихьтин чан ят1а.

Сацикайни тахьаназ гьак1 амукьда,
Ц1уьрнуьгъ хьтин кьарадал фад алукьда.

Хата авач, чазни эхир аквада,
Чунни чпин ужузвилел хъуьреда.

Инсандин нефс парабуруз хата я-
Муькуьбуруз хатур, гьуьрмет багьа я.

Гьардахъ вичин ава къамат, кьакьанвал,
Намуссуздан рик1е жеда т1ак1анвал.

Амалдарвал адаз халис дуст жеда-
Гьа и ч1авуз инсанвални суст жеда.

Гьаятда к1ек:"Зун агъа я виридан",-
Гьараяриз, ухшар жеда делидаз.

Верчер кьула уьмуьр физвай фагъирдин
Дуьньядин гьал гьик1 кьат1уда фикирди.

Кьат1ун патал акьул, фагьум герек я,
Тахьай ч1авуз къимет адан кепек я.

Ингье мадни екъеч1на хьиз майдандиз,
Мугьманди гаф лугьузва са мугьмандиз...