Гьар са к1ват1ал итимривди багьа я 30

Пара хьайи вирт1едикай дад гудач,
Т1имил хьайи ч1авуз сивиз зат1 къведач.

Суьгьбетдин т1ям эхир ч1авуз хъсан я-
Эхир усал суьгьбетни са нукьсан я.

Югъ акъатна, вахтунилай алатна,
Яваш-яваш кимик юзун акатна.

Ахладзава гьар сад вичин мягьледал;
Буш хьана ким, са т1имил кьван легьзеда.

Мугьман галаз, аста-аста кам вигьиз,
Ахгакьзава са яшлу итим к1вализ.

Асадивди гьар камуниз чил гатаз,
Сефилдаказ аквазва мугьман адаз.

Лугьузва:"Хва, уьмуьр пара яргъи я;
Шумуд чавай къакъатнава багърияр.

Гайидални рази тахьун гунагь я.
Жегьилвилин сифет-ери - гумрагь я.

Ашкъидиз муьт1уьгъ хьайит1а айиб я,
Хьайит1ани кьегьал, жеда къариб яз.

Садбуру ваз акьул гуда кефли яз,
Садбуруни кьада вун са дили яз.

Фугъарайриз пехилвили кьас ганай,
Муьгьуьбатдикайни чпиз яс хьанай",-

Рахаз-рахаз ахкъатна ик1 айвандал,
Югур як1ун ниэр къвезвай къажгъандай,-

Негьякьвилиз фикир тагун хъсан я-
Лугьуда хьи; мергьеметлу инсан я.

Гьарда вичиз гьалда дуьнья к1анивал,
Тахьай ч1авуз къадагъани манивал.

Негьякьбуруз т1увадин сир чир жедач-
Манивал тавурт1а я эхир къведач.

Кефияр хаз патав гвай са етимдин;
Низ герек я адан т1варни итимдин.

Гьар са к1ват1ал итимривди багьа я-
Итимар бул хуьрни ч1ехи къала я.

Ширин мез хьун итимдин са лишан туш-
Папахъ ширин мез хьайит1а зиян туш.

Намус я лап халис абур итимдин-
Намус квахьайди ухшар я етимдиз.

Эдеб квахьайди акатда к1урарик-
Къекъвез жеда гьа вич хьтин таярихъ.

И акьулар жувани лап к1евиз яхъ,
Итимвилин къилихар мад виниз яхъ.

Вунни хуьряй-хуьруьз физва гаф лугьуз,
Са шумуд кас гьалтда вал хилаф лугьуз.

Алчахарни чи арада т1имил я,
Фикир тагайт1а и кардиз - гъафил я.

Алчах амал циф хьиз цавуз чк1ида,
Чукь тавурт1а, хуьрни кваз чк1ида,-

Т1ук1лук1арихъ къулайдаказ агалтна,-
Чи ашукьдиз гьихьтин гузва къамат на?

К1вачин хьанва гила ам лап яргъариз;
Вуч лугьуда вуна адан гьунарриз?"