Атанач сад дуьньядал пис-хъсан яз;
Гьар сад ухшар жезва къачур кьадамриз.
Сад акурлай амукьда вун гьейран яз,
Муькуьда кьил яда гьамиш гьарамдиз.
Ашкъи, гьевес багъишайдахъ сир ава;
Жуван асул-бинедиз на фикир цей.
Усал касдиз адакай вуч хир ава,
К1ант1а девлет, к1ант1а, галаз нехир цей.
Гуьзел рушан наз акурай к1анидаз;
Бендедиз ам са агъур хиял тахьуй.
Хабар жеда дердерикай кайидаз;
А язухдиз ашкъи дарискъал тахьуй.
Йикъакайни гьевесдин са гел тахьай,
Кьурай хел хьиз уьмуьрда цуьквер жедач.
Рушазни на, са къуз кьван рик1ел тахьай,
Свас лагьайт1а, ам вучтин мехъер жеда?
Т1ал я рик1из ашкъи, бегьем кайидан;
Са Аллагьдин дарман адаз куьмек я.
Дарман жедач масад рик1из к1анидан,
К1ани кьвадар лагьайт1ани гуьрчек я.
Ягъайт1ани гьисериз к1ус пинедин,
Къайи рик1из ам чими партал жедач.
Уьлчуь тавур, эцигайт1а бинедин
Винел кума, адакай дуьз к1вал жедач.
Ашкъи, гьевес багъишайдахъ сир ава 27
© Copyright: Магомед Мирзоев Мирзой, 2022
Свидетельство о публикации №122030204127
Свидетельство о публикации №122030204127
Рецензии