Гьуьрметдивди урус муаллимриз

(Зи муаллим Таиса Митрафановнадиз бахшнава)

Кьулухъ туна хайи Ватан,
Дагъдин рекьиз вегьейбур кам.
Хвена намус, хвена виждан,
Куьк/уьрайбур илимдин шам.

Фикирарни, акьул дерин,
Урусатдин гуьзел цуьквер.
Рахадайла мецер ширин,
Суьретдални ргазвай хъвер.

Гьукуматдин тапшуругъдиз,
Муьт/уьгъ хьана туна Ватан.
Къалурначир гьич ажуздиз,
Чирвилериз бахшнавай чан.

Четин хьанай гьелбетда квез,
Ватандивай хьана яргъа.
Чи дагълари хъуьрез-хъуьрез,
Рик/ин къене ганай чка.

Рехъ авуна рик/яй -рик/из ,
Кьил акъудна тийижиз ч/ал.
Алахънай куьн илим чириз,
Гьар аялдив тагуз мажал.

Зазни хьанай урус муаллим ,
Митрафановна Тайиса.
Ада гайи урус илим.
Хвенава за яхц/ур йиса. 

Четинвилиз гана дурум,
Ч/угур зегьмет ая гьалал.
Ви гафари гана  заз рум,
Шииратда туна хиял.

Зи чирвилел ийиз дамах,
Хъвер алахьдай ви сивелай.
Тагькимарнай ,заз ви к/валах,
Давам авун лап к/евелай.

Гьайиф ,хьанач ийиз давам,
Квадарнач за а ви илим.
Лезги ч/ал я зи рик/ин дам,
Урус ч/ални зи рик/ин чим.

Юкь агъузна икрам ийиз ,
Гьазур я зун къенин юкъуз.
Аллагьди гуй сагъ чан вичиз,
Яшамиш хьуй са виш йисуз!


Бязибурун кьисметдин бахт.
Ахъа хьана Дагъустанда.
Эхиримжи атайла вахт.
Сурни хьана и Ватанда.

Амачирбур тарихар я,
Гьуьрметдивди тунавай гел.
Чирвилерин арифар я,
Дагъустандин ч/ехи чилел.

Квез чухсагъул, квез  аферин.
Чирвилерин  экуь гъетер.
Эквер я куьн чи вилерин,
Чунни я куь багъдин бегьер!

 13.02.2022 г.