Зи хайи ч1ал

Хъуьт1уьн югъ тир, няни къвезвай,
Йиф дак1ан яз, экв ишезвай.
Зи нефес мадни дар жезвай
Залан дердер рик1еваз.

Вилериз гьич зат1ни такваз
Жув-жувакди рахаз-рахаз
Сейирзавай за текдаказ
Кьисметдин пар къуьневаз.

Петербургдин юкьни юкьвал-
Пачагьрин майдандиз мукьвал-
Аялди к1ват1 кьазвай кук1вал
Гъвеч1и бармак пелеваз

Ам хъуьрезвай ван акъудна,
Гагь ацукьдай к1вач кучудна,
Гагь гуьнедай фидай худна
Машгъул тир ам вижеваз

Къай, мекьивал квазни такьаз,
И биц1екан къугъун акваз
Легьзеда зун  хьана акъваз
Элжекарни гъилеваз.

Фена хиял яргъал хуьруьз…
Акъатна зун хайи к1вализ,
Пичин к1ане мекьи хъуьт1уьз
Кьурай зурар меквеваз.

Атана заз дидедин ван,
Патав гвай хьиз багьа инсан,
Гьа легьзеда акьалтна чан
Алемдал зи ч1ал авай:
 

- Ракъиниз ухшар хьаран фу
Агат, чан руш, гъиле къачу,
Кягъ Мукашдик, жив хьиз лацу…
Нуш хьурай, зи бике, ваз..

Карагна дидедин къамат
Зи вилеркай – залум гъурбат!
Амма ава захъ ч1ал -  къуват -
Дидед патай савкьват яз

Килиг садра, вуч верц1и я!
Дагъдин ятар хьиз михьи я,
Илгьамдин булах- гьуьруь я
Дидедин ч1ал мецеллаз.

Зи дердерин ам дарман я,
Сагъламвал хуьзвай лукьман я,
Адал гьар юкъуз гьейран я,
Рик1е хайи дидеваз.

Уьмуьр амай кьваз заз чида:
Ч1алан рехъ кьуна зун фида,
Вилин нине хьиз ам хуьда
Гьамиша зи рик1еваз…