Мумин Айшади хва хьиз кьабулзава 24

Шукур Аллагь! Са кьадар вахт алатна,
Мад са ц1ийи хабар хуьруьз акъатна.

Тадидаказ жегьил гада азадна,
Перишандиз вири хуьруьз ахладна.

Перишандиз; фитнеди хуьр кьац1урна,
Гунагьсузди къанлу метал ракъурна.

Перишан тир; Жуванди муртад хьана,
Садни авач и хабардал шад хьана...

Кьезилариз мукьвабуруз азият,
Саваб кар я гьар са ч1авуз тазият.

Ам инсандин акьулдин я тамамвал;
Парабуруз, гьайиф, ганва авамвал.

Айшад к1вализ физва Мумин  пашман яз,
Хьайи кьадар крар рик1из дак1ан яз.

Абур паталди, хуьруьн са ч1ехиди
Галаз физва, чуру-спел рехи тир.

Асуллу кар гьар бендедиз дамах я,
Асуллуди гьар санални даях я.

Сейда рекъиз акъуч1айди чир хьана,
Фагъирдиз и хабар лап фикир хьана.

Вуч авурай хва къакъатай дидеди;
Рушни гила экъеч1нава дяведиз...

Хтар хьтин накъвар са-сад вилелай
Авахьзава нурарни гуз чилерал.

Айшад патав физва Мумин мукьва хьиз,
Кьабулзава Айшади ам дава хьиз.

Шел-хвал ийиз, ялварзава Худадиз,
Минетзава к1вализ атай гададиз.

- Чан хва Мумин! Ихтибар я зи руш вал,
Килиг ахку, къалур мийир на бушвал.

Диде акур, вилелай гъам алахьиз,
Мумина гаф гузва адаз, туба хьиз.

Темен гана кьурай пелез дидедин,
Физва Мумин, руш фейинихъ гуьлле хьиз.