Сейда физва кьисас вахчуз 23

Цава физва лацу балк1ан ц1ай хьтин,
Жив кьилеллаз чк1урзавай, къай хьтин.

Фагьумдизни къведачир ам руш лугьуз,
Я субутни жедач, кьегьал туш лугьуз.

Хуш я сифет жавандин, са кард хьтин,
Шивди кьулал къугъвазвай пайгар хьтин.

Кьисас вахчуз стхадин мад вуж фирай,
Масан телеф авурдаз са гуж хьурай.

Чанни гуда стха патал, элкъведач,
Ислягьвилихъ уьмуьрдин мад гелкъведач.

Яргъарилай лацу балк1ан акурлай,
Чуьнуьх хьана Лацак, зурзаз ацукьна.

Масанан балк1ан гьасятда чир хьана,
Балк1андал алайди адаз сир хьана.

Мукьварив акъатна, Сейда акурди
Уфт акъатна жегьилдай, лап агъур тир.

Зурз ахлатна, регьят хьана, ухшаррай,
Гьякь авахьиз, хъвер атана п1узаррал.

Айгъур хьана нуьк1рекайни зирекдиз
Рушан рекьел ялна ада,куьлек хьиз.

Каш-мякь ийиз эгеч1завай, шад хьана,
Суй кьат1айла рушан мукъаят хьана.

- Квел хвеши яз хаинди чин хъуьрезва,
Душмандихъ алчах зи гапур къекъвезва.

Стха кьейи гъилер за ви ат1уда,
Алчах мезни алк1ирда ви хурудал.

Бармак кьилел герек я тек итимдиз,
Кьац1урзава чил вун хьтин хаинди,

Акъуд гапур, алчах"- к1евиз гьарайна.
Къвазна Лацак, серсер хьана алайнал.

Хаин касдиз гьуьрметун им кьадар туш-
Яракьсуздав дяве авунни кар туш.

Кич1е хьайи, садлагьана Лацака
Хкадарна балк1андал са хъвалахъай.

Гьалчна чилел, гъилер, к1вачер илисна,
Амм чабалмиш жезвай рушав эгисна.

Мукъаят тир акъай тийиз, къурхудай,
Гъер авахьиз, ц1егьре тум кьван чурудай.

Килигзава, кьегьал хьана, уях яз,
Гьакь я гафар; алчах гьамиш алчах я.

- Я чан Сейда, зи вилер вахъ ц1разва,
Югъди-йифди заз ви дидар аквазва.

Ваз чизва хьи, заз гьикьван вун к1ан ят1а,
Хьайи дуьшуьш гьикьван заз дак1ан ят1а.

Рахунариз алай чун са тепедал,
Садлагьана са ван гьатна дереда.

Гьава гатаз луваривди, гужлу тир,
Заз ак1 хана; ам са зурба атлу тир.

Хкадарна мукьварив гвай синелай
Ц1айлапан хьиз лекь фена чи винелай.

Татаб гана, Масан кьулухъ аватна,
Зунни, хкъаз алахъайди, ахватна,

Хатадай гъил са куьлерихъ галк1ана,
Ч1урун ц1егь хьиз, зун винелди хтана.

Бамишзавай, зирек нук1 хьиз мурдарди,
Руш к1аникай гахкъатна фендигардин,

Тур къахчуна, гьалчна тадиз Лацакал,
К1вач ц1удгъунна аватна мад къартакай.

Руш вичихъ агъун тавурди чир хьана,
Мад и гьални Лацаказ фикир хьана.

Ялна агъуз, гьалчна чилел уяхдиз,
Къужахда руш бамишзавай алчахди.

Кич1е рик1из муьгьуьбатни агъур я;
Ашкъи, такабур инсандин абур я.

Хабар гьинай, садлагьана хкатна
Дагъдикай са гъвеч1и к1ерет1 акъатна.

Лацак кьуна кемендивди есирна
Дагъларин тик къартарикай галч1урна.

Зурзазвай рушал япунжи вегьена,
Балк1андал эхцигна тадиз хъфена.