Фад агакьна хабар ашукь азадна 22

Гъам-гъусадин хура авай дидедин
Мет1ерал кьил эцигнава балади.

Вил галамач яшайишдин чешнедихъ,
Амачирла несиб-ери  бинедихъ.

Абур патални сес амач сузадин,
Рик1икайни къван авунва къазади.

Акъатнава кьурни язух вилериз;
Гьикьван хьурай фагъир шехьиз, эвериз.

Мет-кьил гатаз, вич-вичикай хкатна,
Гьинай-гьанай рахазва мез алатна.

Гагь кьилеллай шал хт1униз к1усзава,
Гагь кьейид хьиз ахвариз физ, сустзава.

Лайлаярни ийизва гагь баладиз,
Гагь лугьузва: "Сусар гъизва гададиз!

Мехъерин пул к1ват1из фенва яргъариз;
Килиг садра сусахъ авай бахтариз.

Хквезва ам савкьатарни к1улаллаз,
Нурар гур гапурни шумал юкьваллаз"

Са т1имил вахт алатайла кис хьана,
Ахпа шехьиз, кьил гатазва пис хьана.

Гагь лугьузва: "Вун кьенайт1а хъсан тир,
Вун себеб яз амач зи хва, аслан тир".

Гагьни рушаз: "Я чан бала дидедин,
Ви бахтуник ц1ай кутунва фитнеди".

Сейда, фагъир, етим хьтин к1емева,
Гъамни-гъуса винел текъвез къенева.

Гапурдилай пис я агъур туьгьметар;
Эх жеда жал рик1ивай ин лянетар...

Таб-гьялледин мензил бегьем куьруь я,
Таб гьялледин дуванни-гьахъ дугъри я.

Чинебандахъ авайдини са вил я,
Дугъривал ви к1ула авай къизил я.

Мад са чубан эхвич1нава дагъларай,
Ван хьайила хуьре авай хабарар.

Ашукь бат1ул туширди тестикьарна,
Лацакан фитне я лугьуз тикрарна.

Маса хабар чк1изва мад т1урфан хьиз,
Гила халкьдиз Лацак язва душман хьиз.

Гъулгъуладив кушкушзавай папарин
Сес галукьна рушан жегьил япарихъ.

Хажалатди гьелекнавай бендедиз,
"Къарагъ зи эркек"- лагьана дидеди.

Тадидаказ хкадарна са лекь хьиз,
Стхадин пекер алук1на зирекдиз.

Гьазур хьана, физва гвяниз Лацакан,
Балк1андал акьахна лацу къапак квай.

Береяр галай патахъди йигиндиз,
Кьисас вахчуз, физва кьилив хаиндин.