Гъамлу вилер килигзава цавариз 20

Нисинихъди к1ват1 хъижезва кимелди
Гъвеч1и-ч1ехи, хуьруьнвияр, куьрелди.

Пуд югъ къекъвез физва абур дагълариз,
Акъатнавай бязибур лап яргъариз.

Акурбур са гелер я къал-макъалдин,
Авачир мад маса гелер заралдин.

И арада цаварай хьиз аватна,
Салам гана Лацак кимел акъатна.

Ахъайиз башламишна ам бередал
Суьруьдив гвай и кар хьайи береда.

Дагъди а пад аквазвай лап капаллаз,
Михьи гьава авайла лап мукьваллаз.

Ацукьнавай ял ягъиз са дуьзендал.
Кьат1 хьана циф алахьай са геренда.

Кьве кас алай рагар кьилел зурар гуз,
Сада-садаз гъуд эцягъиз, румар гуз.

Сад Мумин, сад Масан тирди чир хьана,
Вичиз са к1ус и к1валах фикир хьана.

Яваш-яваш циф гьавадик какахьна,
Са т1имил вахт алатна мад ахлахьна.

Гил акуна Мумин хъфиз жигъирдай,
Вахт авачир и кардикай фикирдай.

Гьатна гила ам и кардин гъавурда,
Яна Масан вегьенвайди чухурдай.

Фикир-фагьум авурдалай кьулухъди,
Винел хьана тапарар гил ашукьдин.

Тухвана халкь Лацака мад дагълариз,
Лагьай гафар гафаривди тикрариз.

Дагьард к1аняй гадад мейит жагъана,
К1арараллаз гада хуьруьз къгъана.

Кьейи жегьил ферикъатна сурара,
Мумин тухузва жемятди рагарал.

Акъвазнава Мумин синел сефилдиз,
Садбурузни язух къвезва жегьилдин.

Къан вахчудай сагьиб халкь я Масанан;
Дагъди хурал к1ват1 хьанава инсанар.

Эхирдин гаф т1алабзава Мумина;
Сес акъудзава гьулдандин симинай.

Гъамлу вилер килигзава цавариз,
Цуьк акъудна атирар гвай сувариз.

Вил галамай и дуьньяни темягь я,
Гьайиф уьмуьр гьа иналди куьтягь я.

Тахсир квачиз фейибурни гзаф я,
Тахсирсуздан к1вал ч1урайди хилаф я.