Сейда ала айвандал 18

Кьил хураваз Сейда ала айвандал;
Вуч мусибат атанва ин хзандал.

Агъур гъамар вагьши, ч1улав гъуьлягъ хьиз
Къене ава, к1анивал физ йигънагъ хьиз.

Я чан Аллагь! Ви регьимар гзаф я!
Бес и рушал атайди вуч инсаф я?

Бахт элкъвена са легьзеда кьулухъди,
И руш хьанва тахсирлуди шулугъдин.

Ашкъидикай садни ч1урук1 рахазвач;
Гьарда рик1е са к1ус кьван ам авазва.

Амма гьарда рик1е авайди сир я,
Адаз муьт1уьгъ хьайидини фагъир я.

Гъибетчидинди негьякьан са т1ул я,
Адав багьна вугайдини бат1ул я.

Фитнедикайни садни хуьз хьайид туш,
Я садални ада абур гъайид туш.

К1венк1вечини и кардин са къари я,
Я чан кьейди, хьаначни ваз к1ани яр.

Вуч авурай, гьарда к1вале руш ава,
Амма илчи патавай уьтмуьшзава.

Гьик1 ят1ани, сабур рушаз хъсан я,
Сабур квахьайт1а жедайди гьижран я.

Агъзур фикир къекъвезава келледа,
Жизви кьванни ван-сес амач куьчеда.

Гьа и ч1авуз сес акъатна зайиф тир,
Са фагъирдин лугьузвай лап гьайиф физ.

Накъварин сел къвез авахьиз вилерай,
Гъам-гъуссадин вирер хьанва чилерал.

Руш чакъалрин юкьва гьатай жейран хьиз,
Ацукьнава айванд пип1е аман физ.

Я чан Аллагь, на акьулар чиз гана!
Амма фагьум, кьат1ун вуна низ гана?

Белки и руш гьатдачир и к1евера,
Бахтуникай пай ганайт1а мегера.