Гьяйванатарин гьюжат

Сад йигъан гъуншдин икриъ,
Наънан-вуш хабарсузди,
Гьяйванатар уч гъаши.
Фунуб к1убниб вуш к1ури
Ипна гьарай мурари.
Гьюжат ккебгънийи швеъди.
Гъапи:  «Хъебехъай ари,
Гъузну ккун ухьу вари
К1убнибдиз гьюрмат ади».
Хъа, жанаври к1ур швеъдиз:
- Узхьан гуч1уру вардиз!
Гъяркъиган уч1ру к1албар,
Гук1ни шул вари шей’ар.
Швеъди: «Пагь! Дици шулдар!
Арда пуз вунив гафар!?
Узу т1ап1иган йиз ушв,
Саб фук1а багахь шулдар.
Хъа либг,  фицдар вуш бацар,
Фу шул узуз барабар?»
Гьюжатнягъ гъюбч1вру гьяйван
К1уру, дазабгну к1ул чан:
- Вуйчва дарш учву гатар?
Фу гъабхьиш  йивуз бацар,
Ясан алахьуз кьац1ар!
Шулзухьан йивуз кьусмар.
Саб шейъкьан багахь шулдар,
Гьаци дарш хьибдай мадар.
Гъафнийи минди саб кьюл,
- Дубгнайив, - гъапи, - аькюл.
Гьяйвни кидирчу улар.
Кьюлу: «Гъивишра кьусмар,
Увхьан учуз гуч1 адар!
Кьюлаз гуч1 тувруб сабан
Гьяйван бабкан дубхьнадар!»
Уч гъахьи  хайлин шей’ар,
Хъа дурарихъди ничхрар,
Ап1уз хъюгъну гьюжатар.
Фу к1убниб вуш, фу адлу,
Фтиз артухъ аьгъяш думу.
Гьам ариъ сар биц1и бай,
Гъафи гьюжат ап1уз пай.
Саб аьхю ишик1 дивну,
«Гьяйванатар» уч дап1ну,
Вижна ктарди заткьан чаз,
Гъурхну дурар чпин хулаз.