Гьахъни-нагьахъ чкадал гъун герек я. 13

Гьахъни-нагьахъ чкадал гъун герек я,
Тахсирлудан гьакь ат1урди керчек я.

Гьар са кардай кьил акъатун мумкин туш,
Инсаф тахьайдаз и к1валах четин туш.

Аллагьдихъай кич1евализ винелай,
Герекнални хъвер алахьиз сивелай,

Гьакьар ат1уз алахъайт1а дуьз къведач,
Ам ацукьай кимни гьак1 ужуз жеда.

Адалатлу дуван акъуд гьар сефер-
Уьзягъдаказ къекъвез жеда кар себеб.

Рехивални акьулдин са ери туш,
Къанажагъдин сифетни я чуру туш.

Жавабдар инсандиз абур таниш я;
Вич намусдин, уьтквемвилин нехиш я.

Тежер кардив эгеч1унни герек туш,
Адакай гьич я садазни куьмек туш.

Вилер к1евна авур к1валах дуьз яни?
Я тахьайт1а ам акьулдин гуьз яни?

Кьуд патахъай ахтармишна кар ая-
Хийир авай чалгъадикай тар ая.

Галтугайдаз югъ-йиф вичин менфятдихъ,
Ихтибарвал хьайиди туш жемятдин...

Акъатайла ялтахвализ гъибетчи,
Тум къекъуьриз, мез аватна минетчи,

Итимвилиз к1ур гана хьиз,  фитнедин
К1аник жеда, есир хьана нянедин.

Жуван акьул жуван кьиле хъсан я,
Чара бугьтан, къизилдинни, зиян я.

Инсанвилин кьадарар низ чир жеда,
Валлагь адаз таквадай хийир жеда...

Са-сад, са-сад чуру рехи итимар,
Аста-аста, рик1е аваз регьимар,

Фикирарни лугьуз чпин дикъетдив,
Яб тагуз я тапарриз, я гъибетдиз,

Алахънава акъудиз кьил и кардай.
- Бат1ул туш,- лугьузва сада,- ухшардай,

Муькуьда фад,- Мейит жагъун тавунмаз
Вуч лугьуда? Садни авач акунвай.

Сифте чна кар хьайивал чир ийин.
Чир авуна, ахпа са фикир ийин.

Гьелелиг, кьил акъуддалди и кардай,
Меслятна ам ацукьарун зинданда.

Халкьди Мумин тапшурмишна, арадай,
Лап са кьвези, яшар хьанвай къужадал.

-Гешилавди ацукь жедач дустагъда,-
Лагьана, ам вичихъ галаз хутахна.

Недай-хъвадай гъайилахъ архайиндиз
Эхтилатиз башламишна секиндиз.