Чунгурдин симни гапур са ракь я 12

Агъур Фикиррив рик1изни т1ар хьана
Хъфизвай зун, рехъни бегьем дар хьана.

Хиялривди кьилни бегьем агъузна,
Кьилел атай агьвалатди кефсузна...

Халкьди сиви малаикни саврухда,
Дуьз рахадач, фейит1ани язухдай.

Тадивилин сес атана яргъалай,
Акъвазна зун килигиз са к1унт1алай.

Масан къвезвай балк1андаллаз, зирекдиз,
Яргъалай ам аквадай са куьлек хьиз.

Садлагьана хкадарна вилик зи,
Хъвалал алай гапур кьуна гъиливди.

- Гапур къачу, экъеч1а фад майдандал,
Атанва зун инал, физ ви дувандай.

Вун мугьман, зун иеси туш и гьалдин,
Гьакьни-нагьакь чир ийида ажалди.

Лайихсуз дагъвидин эхир кьиникь я,
Бегьемсузвал гила ви заз тестикь я.

Ви ажалдин тахсир тахьуй зи къанда,
Итим хьтин, вилик экъеч1 майдандал.

 Минетна за чанни лугьуз, яб ганач,
Гьуьрметарни авур вири таб хьана.

Зи гафарин къуват мад зайиф хьана,
Са кьадарни заз и кар гьайиф хьана.

Эхир, нубат атай ч1авуз гапурдал,
За лагьана,- Аватда чун абурдай.

Мажбурна зун гапур кьуниз, чарасуз,
К1анзавачир заз и к1валах, гьаясуз.

Хура гьатна буьркьуь хьайи ажугъдин,
Ада вилик, за ялзавай кьулухъди.

Чунгурдин симерни гапур са ракь я,
Ахмакьдан гъилевай гапур шандакь я.

Мехъер кьула гапурди гел герек туш,
Акьуллу меслятдизни ам куьмек туш...

Гапуди яз гапурд сивел гелзавай,
Гапур авай гъиле ажугъ, хъел авай.

Ц1елхемарни кьуд патариз чк1извай,
Адан гапур зи гапурдал алк1извай.

Кьил къакъудиз за т1имил шандакьзавай,
Ада хъиляй сарарив жакьракьзавай.

Вахт акъудзавайди ада кьат1ана,
Адаз зи хъел мадни к1евиз атана.

- Итим ят1а гьужум ая кьегьалд хьиз.,
Ялиз кьулухъ, катмира вун аял хьиз.

Эхир вучда, гьикьван за кьил гакъудда,
Шумуд сефер ягъиз гапур алудда.

Рум гана за гапурди к1венк1 эцигна
Адан хурал, дикъетдивди килигна.

-Лагь, гила за яб гузва ви делилриз,
Заз чизва, вак ц1ай кутунва пехилри.

Ахъайна за гьар са кьиса хьайивал,
Дагьард к1аниз, хкадарна фейивал.

Чинал алай хирериз ам килигна,
За лагьайвални сад-садав гекъигна.

Са кьадар чун къвазна, ахпа элхкъвена
Гьар сад вичин хуьр галайвал хъфена.