Зи гьакь ат1ут1 ялавдин ц1у кайибуру 11

- Аллагь квелай рази хьуй зун саймишай,
Куь къуллугъда къвазнава зун гьамиша.

Жуванбур хьиз, заз куьн вири ширин я,
Куь хуьре зун мугьман я, архайин я.

Стха хьиз зун алахънавай кьабулиз,
Лайих яни заз куь булах рагъулиз.

Бат1ул я зун, дустун кьилив, к1валевай,
Фидай ч1авуз, булахдилай рекьевай,

Гьейран хьана, к1вачер къвазна т1арамдиз,
Лук1 хьана зи гьерекатни илгьамдин.

Къаних инсан, са хуп1 хъун мурад хьайи,
Ни айибда, дарман патал яд хъвайи.

Са ц1верек1диз игьтиятсуз уф гана
Гуж хьана заз, йикъакай гил йиф хьана.

Мад сеферда акунив гьейран хьана.
Шукур Аллагь! Рушакай дарман хьана.

Зи беденни кьунва гила ялавди,
Гъиле ава зун ашкъидин жилавдин.

Зи гьакь ат1ут1 ялавдин ц1у кайибуру,
Я тахьайт1а, ашкъидин нур хвейибуру.

Эгер муьгьуьбат хьайит1а бат1ул яз,
Зи тахсир я, куь жаза заз кьабул я.

Ашкъидивай магьрум авур беденда,
Руьгь туьхвена, амукьда ц1ай эхъендин.

Эхъендизни жаза вуч хасарат я?
Амукьда тек мукьвадаз хажалат яз.

Тур куьди хьуй, гардан зиди, дугъри хьуй,
Ч1урук1 рахайт1а мез, беден куьри хьуй.

Гьар са кьиса хьайивал квез ахъайда,
Аллагь къалум хьурай ч1урук1 рахайт1а.