***

ЧИ  ДЕРБЕНТ

«Неррен» к1еледай килигиз
Капан юкьвал ала Дербент.
Касрин гьуьлуьн къерехдаваз,
Гилавардик гала Дербент.


К1еледин диб, ирид чилин,               
Хандак1даваз, дегьнедик ква.
Къенен патан талукь тир ччин,      
Ч1уриз техжер чешнедик ква.


Т1имил агъуз гуьне квай хур,
Секуьл к1валер агалтнаваз,               
Уьмуьрдикай тахуй хатур,
Муьскуьн я  сур сегьнедик кваз.
 

Гурард к1арар хьиз магьалар
К1уьд гьисабдин кьадардава.               
Дар куьчеяр, гъенар, карар
Гуьт1уьвилин бизардик ква... 


Къуба алай миск1и, дегь тир,
Килса, хач квай, ише тефей…
Аманатар я шегьердин,               
Сад имандик, муькуьд музей...


Ангье сурар тир «яхц1урар»,
Юкьвал гуьмбет - рагъул тавда.
Дин хвейибурун сан-кьадар
Къалурзавай чкаялда…   


Цлан т1ак1а эцигнавай,
Лампа хьиз я лацу маяк.
Лезги гамун гиширдавай
Сумаг хьиз я гъеннии - гьаят.


Девиррилай амай к1валер,
Иски к1алубдин чагъдамай,
Ц1уру хьана, чандал техкъвез,
Зарул гьалдик кваз, сагъзама .               


Къаяб къванцин цал-паруяр,
(Дегь тир шегьер авай юкьва.)
Анирик  квай кьвед- кьве варар,               
Сагъ хуьн патал «запабдик» ква.


Йисар течир, ништа гьикьван,
Сур къатара хьанвай игис,
Аманатар, чир хъийир тан,
Гьеле ама, к1ан яз  «силис»…

Ц1ийи куьче, парк, майданри,
Дараматар жуьреба - жуьре,
Акунрин к1алуб хъсанриз,
Желбдай агьвал кьунваз хиве,


Къерех тирвал гьуьлуьн ценцин,
Кьибле, кефердихъ фрягь жез,
Къаматни хуьз къадимвилин,               
Ч1ехи, иер жезва къвез-къвез…


«Неррен» к1еледай килигиз,
Махлукьд капал ала Дербент.
Виринрал 2000 кхьиз…               
Сувар - *чавдик гала Дербент.

2015 й. 

И йисуз шегьердин 2000-йис жезвай кьван…
Юбилейдин йикъара  кхьей шиир.

*Чав –  жезвай вакъиадикай, гьалдикай аян хьун, хабар гун