Сейдади ягълухдив Муминан хирер михьзава 8

Виняй агъуз ял авуна йигиндиз,
Хкадарна Мумина са мензилдиз.

Къунтарилай къунтарал са аслан хьиз
Къудгаз-къудгаз эвич1на пагьливан хьиз.

Рушар гьеле агь-вагь ийиз амазмай;
Ашукь гада тади ийиз хквезвай.

К1евиз кьуна квар къгъана патах са;
Квар ят1а ам, я тахьайт1а чанах са.

Гьикьван рушаз хьайит1ани дак1ан яз,
Килигзава гададиз ам пашман яз.

Кук1вар хьайи квар аквазвач вилериз,
Килигзава Муминан ам хирериз.

Кьежир ийиз кьилел алай ягълухдай,
Михьзава фад гадад хирер, язухдай.

И гьал акур рушарин пагь ат1ана,
Ц1ап1рап1ариз вилерал нур атана.

Килигзава гьуриятдин жегьилдиз,
Гагь язухар ийиз, гагьни пехилдиз.

Гьикьван язух авурт1ани, бат1улди
Кушкушзава эрзиманлу акьулдиз.

Чеб эцигиз Сейда алай чкадал;
Низ чида вуч акъатдат1а арадай...

Муминавай вичивай вич квахьзавай,
Ашкъидин гьисс бедендиз авахьзавай.

Ахварай хьиз, женнетдин къацу багъда,
Суст жезавай гьуьридин ам къужахда.

Сад лагьана, лаш галукьай пев хьтин,
Рангар хьана чинавай лап цев хьтин.

"Астагъфируллагь" лугьуз, тажуб хьана,
Дугъри ят1а имай, зид айиб хьана.

"Зун ахладин, ви къаматдиз хъен тахьуй,
Фитнечидиз идакай буьгьтен тахьуй.

Сагърай Сейда" лагьана ам элхкъвена,
Регъуь хьана, тадидаказ хъфена.

Къах хьанавай юлдашарни, эсэр яз,
Мягьтел хьайи Сейда амай, серсер яз.