Хуш гьисерив ац1узва хур маралдин 7

Ашукьди сес атай ч1авуз булахдив
Акъвазнава руш регъуь яз, дамахдив.

Гьейран хьайи, рик1 ц1разва маниди,
Хъуьхъверизни акъатна ранг п1инидин.

Хуш гьисерив ац1узва хур маралдин;
Эдебди кьил агъузна са саягъди.

Садбурун вилер рушалла пехил яз,
Садбур ава серсер хьана, гъафил яз.

Рик1елай физ гъиле авай кварарни:
Ачух сиве нур гузава сарарни.

Бахтлу гьисер, куьн виридан чан хьурай,
Гьакъикъат яз рик1ин эрзиман хьурай.

Зарафатдив са гуьзелди, гьаясуз,
Ик1 лагьана. Герек тирни чарасуз?

"Ви чкадал зун алайт1а, зирекдиз
Кьуьл ийидай вини т1улал, эркекд хьиз.

Сад чунгурдал къугъваз, сада зил кьадай,
Кьуд к1вачини т1арамдаказ чил кьадай".

Хъуьруьнарни зарафатар агъур я;
Вилер чиле ава рушан, мажбур яз.

Регъуь хьайла кварни фена гъилевай:
Къаридин хьиз, нек къечягъиз сувавай.

Элкъвез-элкъвез, къвез элягъиз к1унт1арал:
Гьарай фена, кич1 акатай рушарай...

Агакьдалди и квар к1амун к1анелди,
Са вакъиа мад хтана рик1ел зи.

Гатун юкъуз, суван т1улал к1ват1 хьана
Ацукьнавай ял ягъиз, галат хьана.

Кавалдаллай баде кьвези яш авай,
Квар къечягьиз, бегьем дирибаш авай.

Мани лугьуз, чанарзавай къариди,
Гишин ч1авуз темягь гъида гъариди.

Нек1единни гъарид кьадар гекъигиз
Вахт рекьизвай чна, кварциз килигиз.

Гьа гила-мад, гьазур жери сеферда
Са аялдай акъатна сес эвердай.

Килигайт1а, яваш-яваш юзариз
Ацукьнавай къари фена ахвариз.

Кварни фена элкъвез-элкъвез к1ват1 хьана,
Амукьайди чазни хажалат хьана.

Исятдани гьайиф ама ч1емедин,
Чаз ахкурди са к1ур хьанай суьзмедин.