Совг1а мухь боацаш мустафа ганижев

      СОВГ1А МУХЬ БОАЦАШ               Мустафа Ганижев

Бекъа къовсама юккъе, эшама юккъе,
совг1а мухь боацаш, д1акхача моттиг йоацаш,
деррига дуташ, х1анзар эшашдар даькъе,
лакхе болхарашта юхбахка никъ боацаш.

Йовхараш хинна мухо, чатар этт1адеш,
кхерий лаг1аш 1аьржача сигала долха,
бала боаг1а – оал, кофех г1о бухе южаш,
Вай долхача хана хула шелалаха.

Уж, дохкан гаргаш д1а-х1а лелхача хана,
кхотаданна йоазувах сел догдахарца.
дегабуаман кхоане – къаьна чов мо хина,
саготон г1айг1а т1аьда барцкъан к1ийленца.

Фоарт юхе лоац, эккхавеш тайна лазарах,
из к1аьда доалдар, болатал ч1оаг1ах хулаш –
цхьаь цхьалха иллаш лекха метте, са туврах,
сигален к1ал, ц1ен дошо лана, сайре луш.

Дусаргда деррига селхан ца деш дисар,
дицлургда деррига селан доадеш хинар.
Дог1о марх1воларо, бохьлу безамбар,
Йийза ц!а хул д1айовш, кхыча оаг1уврахьар.

Бартбетташ 1уйрено хьахьеж елакъежаш,
элеш дизза, гизги маза хьабеш лелар,
тувладанна бераш мо кхерах тослуш,
атта доацаш хин лоаман бовхьамаш довхьар.

Беккъа къовсама юккъе, эшама юккъе,
совг1а мухь боацаш, д1акхача моттиг йоацаш,
деррига дуташ, х1анзар эшашдар даькъе,
лакхе болхарашта юхбахка никъ боацаш.
                07. 01. 2022 ш.