Муминан рик1елай Сейда алатнач 3

Са югъ, кьве югъ, варзни гьа ик1 акъатна,
Муминан рик1елай Сейда алатнач.

Яваш-яваш хажалатни гуж хьана,
Жегьил гада гагь вик1егь, гагь буш хьана.

Ризкьедикай гьязни амач, сефил я,
Аламайди чинал к1апни кьве вил я.

Дидедизни и кар лап фикир хьана,
Рик1 алайдан рик1е вучтин сир хьана!

"Я чан бала,белки имай вил ят1а,
 Къакъатайбур белки вал пехил ят1а.

 Са т1ал авай, зайиф чка тахьайла,
 Чукьни тийиз ик1 жедани, рахайла".

Халкьаризни вилер ава, буьркьуь туш,
Лугьудай кьван хуьрни еке-гьяркьуь туш.

Дагъди синел лекьре авур к1вал хьтин,
Сад к1улава садан, дарискъал хьтин.

Манидин сес акъатайла шириндиз,
Къецел къведай къуншияр архайиндиз.

Гьар са ч1авуз макьамдихъ гьевес авай,
Гил чунгурдихъ перишан тир сес ава.

Йифен ч1авуз секин хьайи дагълари,
Тикрарзава агъур сесер ялварин.

Гъамни хифет авахьзава к1амарай,
Муьгьуьбатдин гьевес я жал тапарар?

Кьефесдавай билбилдинни язух я,
Рик1 кайидал аламайди къабух я.

Фикирдик ква къуншиярни мукьваяр,
Лагьай кьадар гафар жезва гьавая.

Муьгьуьбатдин гьевесди дагъ патарда,
Вич атайди алемдизни хабарда.

Шел-хвал галай ашкъи гужлу са пар я,
Лугьуз жедач, белки имай назар я.

Фалчид патав физва чара ат1айла
Язух диде, хажалатди чрайла.

Эхир хуьруьн яшлу итим атана,
-Я чан бала,-Муминаз ик1 лагьана,

-Гъам, хажалат алт1ушайла пар жеда,
Сан авачиз рик1из бегьем т1ар жеда.

Себебдикай, къурху хьана, ял мийир,
Т1имилдакай дагълар ийиз къал мийир.

Кардин бине чир ая на зирекдиз,
Умуд ая, ялвар ая Фелекдиз.

Гьерекатна кьил акъуд на и гьалдин,
Гьякь ат1уда гьар са кардин камалди.