Мумина рушан капалай яд хъвана 2

Сур вахтара Ашукь Мумин т1вар алай
Жегьил хьана, чанда руьгьни звар авай.

Хуьряй хуьруьз фидай чунгур хураллаз;
Ашукьдин пай ганвай адаз гьалал яз...

Вахтар физвай акваз-такваз алатна,
Са юкъуз ам патал хуьруьз акъатна.

Са дерт аваз акъвазнавай, дарих яз
Рекьин патав, сив кьурана, къаних яз.

И арада булахдилай гап1ал са
Хквез хьана, к1венк1ве авай марал са.

Юкьва авай , къугъваз гимиш кемерни,
Гуьрчекдаказ генжедиквай мекерни.

Беневшайри безетмишай сал хьтин,
Гьар са кьадам рик1ин сир-хиял хьтин.

Гуьрчеквилин сан-гьисабар т1имил туш,
Къимет вичиз гудайдини къизил туш.

Аял хьтин акунаризни бахтлу,
Гьар к1валахиз акьуллу, игьтиятлу.

Бейхабардиз йифен цава гъед хьана
Гьатда хура ширин аваз, бенд хьана.

Гьеле яргъай Сейда тирди чир хьанай;
Хабарсуздиз гьисерин есир хьанай.

Масанан вах адаз хъсан таниш тир,
Хесетарни рушан гьак1 бегенмиш тир.

Сифте яз ик1 къалаблухди къугъуриз
Къвазнавай ам, лугьур кьве гаф жугъуриз...

Яд т1алабна вик1егь хьайи жегьилди:
Яраб гада гьик1 авайт1а сефилдиз.

Мумин акур рушан чин ачух хьана,
Яд т1алабурлай адаз язух хьана.

Къаб жагъанач, пешни гьатнач паркьулдин;
Сейда ава, фагъир бала, бат1улдиз!

Хер хьанавай Мумина гъил себеб яз,
Вичин капуз эвизна яд, эдэб яз.

Капун кьулал земземдин са вир хьана,
И кардикай Муминаз таъсир хьана.

Жув жувакай квахьна хьи гьейран хьана,
Хвайидини, нуьк1ре хьиз, дарман хьана.

Икьван гагьда ада хъвайи ятарлай
Ширин тир ам, шербет хьтин, ухварлай.

Акур садни, ц1раз жедай, темягьдив,
Ац1ай вирни тухудай гьак1 иштягьди.

Гьисер хъунив тух хьайиди вуж хьанай?
Гьевесдизни гьисерикай луж хьанай.

Азарлудаз дарман хъвайла нуш жеда,
Бязибуруз адакай бейгьуш жеда.

Фагъир касди хъуналди ам дарман туш,
Куз-хъукъузвай рик1изни я хъсан туш.

Язух гада: вирт1едилай ширин яд
Хъвайи ч1авуз, гьалар пара четин я.

Жегьил руша авур амал ажеб тир-
Айиб мийир , рик1евайди эдэб тир.

Вичин къилих, вичин крар дамахдин,
Ухшар ава гьамгадин циз булахдин.

Мермер хьтин шуьшедин къаб хаз тахьуй,
Дугъри амал, саф к1валахар наз тахьуй.

Стхадиз хьиз яд гайила капалай,
Ч1уру амал хьиз аквада паталай.