Йифиз ятахда 1

Йифен ч1авуз къацу хурал ятахдин
Япунжидал ярх хьана са хъвалахъди,

Лап мукьварив варзни къведа нурар гуз,
И дуьньядин сирерикай хабар гуз,

Ухшар хьана гагь гьуьлеллай гимидиз,
Гагь бахчада агалкьнавай халидиз.

Секиндаказ капал атай, перишан
Вацра чинлай аквадай хьи биришар.

Сагьибдаказ амукьдачачир гьисерин;
Суьгьуьрда аткидай вацра вилерин.

Хиялри сирнавда вили къатара,
Цавун аршдин ванер гьатда япара,

Руьгьни беден, алем вири сад хьана,
Гьисерикай дуьньядин азад хьана,

Рахаз жедай гъетер авай багълара,
Мал-девлетар вири жедай тапарар.

Жаннат багъда къекъуьналди тух жедач,
Чара ник1ел къулай алачух жедач.

Жуван чанта жуван к1ула хъсан я,
И чилерал атанва вун инсан яз.

Хилас ая агъудикай мурадар,
Ширин жеда ваз дуьньядин баядар.

Атай кьве югъ зегьер к1ват1из алахъмир,
Винел падни ц1алц1амариз дамахмир.

Пакад югъни бейхабар мугьман жеда,
Цавариз физ ви руьгьдиз залан жеда.

Пел эцягъайт1ани ахпа хийир туш,
Лугьуналди "чидачир", им я сир туш.

Михьи рик1из хас я гуьзел къайгъуяр,
Патавни гьич къведач нукьсан, агъуяр.

Гьар жуьредин хиялривди ац1анвай,
Зи рик1елни мад са кьиса хтанва.

Адан къимет виридалай багьа я-
Зи дередин, зи дагъларин гьава я.

Вацран къадир арандиз гьик1 чир хьурай,
К1ан тахьайдаз и баядар сир хьурай.

Винизвал я: гьуьрмет ая тарихдиз,
Рик1 ачуха дуьз къилихдиз, лайихдиз.