***

ГЬИНВА  ВУН,  Я  ГЬАХЪ ? 

(часпар - *часпархана циклдай)

Чун нин рик1ел ала,
Вуж хьуй чаз панагь,
Лагьт1ун, я Аллагь!
Вуч тир чи гунагь,            
Ат1уз ик1 чи  пагь?! 
К1андач жез чалахъ,
Гьинва вун, я гьахъ?



Вуч патал чи гьал               
Гъанва пис йикъал:
Халкь кьве патал
Пайна, мукьвавал
Авунва яргъал?!               
К1андач жез ч1алахъ,
Гьинва вун, я гьахъ ?

 

Акур туш ихьтин
Часпар, - квай кьве чин:               
Халкьдал, тир секин,
Илит1на хьиз кин,
Гьалда  тур  четин!
К1андач жез ч1алахъ,
Гьинва вун,  я гьахъ?               
               


Часпарханад сив,
Парар жез къуьнуьв,
Рум гуз гъил-кьуьлуьв,
Нупа техуьн вилив,-
Т1ул хьанва  вичин.               
К1андач жез чалахъ,
Гьинва вун, я гьахъ?



Пул - савда ина.
Кьуш - файда ина.             
П1ип1 - далда ина. 
Чин гвайда ина...
Халкь къвазриз ччина!               
К1андач  жез ч1алахъ,
Гьинва вун, я гьахъ?



Кьегьат мажал-вахт
Къакъудиз кьве къат,
Течир куькве гьат
Хьанва махлукъат…
Гьа им ян чи бахт?!
К1андач жез ч1алахъ,
Гьинва вун, я гьахъ?
               


Миннет-дад  мецел...
Первердигар, хъел               
Къвемир, къвезва шел!
Азабдик ква эл
Часпардин гуьрцел!
К1андач жез ч1алахъ,
Гьинва вун, я гьахъ?
         


Чун халкь я дири,               
Тушт1ани ири,
Кьадардиз гъвеч1и.
Кьве уьлквед кири…
Хьанва чун вири.
К1андач жез ч1алахъ
Гьинва вун, я гьахъ?



Фикретак ква хъел:               
Нупа кьулан йифел
Гьалтна.  Себ сивел
Алаз,  агакьна
Эляч1дай ц1арц1ел.
Пакамлай к1вачел               
Хьана часпард  варцел…          
К1андач  жез  ч1алахъ,
Гьинва вун, я гьахъ?!
               
2007 й.
*Часпархана - таможня