***

БУЛАХ
 (элегия)

Шуьк1уь гъал хьиз яд жез авахь,
Хьирхьам-гьешемри  кьунва гунг.
Т1амп1-т1амп1 - ванцик  ст1алар к1вахь
Жезва, - абру гагь гузва ч1ун.


Сагъ - чагъвилинд туш къе ви гьал.
Латар хьанва члаф – усал.               
Аск1ан лигъер,*  ваз тир мукьвал,
Туьмеррик ква наши гарун.               


Жигъир амач вахъ зун тухвай,
Вич къекъвер тир, тик гуьне квай.
Ч1ур акъатна хьанва квахьай…               
Рик1еллама  патав атун.


Сифтедай аял яз атай,-
Булушкадин ценцик кк1ай…
«Яд це заз, де...» - на заз яд гай,
Булахрикай сад хьана вун.


Ччин цакари кьунвай таза,
Кьве кутар* гваз, *цц1вел гада,
Хпер хуьдай тирла нупа,
Ви чешмедал ракъурнай зун.


Мугьуббатдин ашкъидик кваз,
Акун патал тават жуваз,
Чешмедал жер рушарин наз,
Ажузвал тир, кьабул тавун.


Уьмуьрда хьай легьзейрик, заз,
(Хьайила жув къарихдихъ кваз,)
Тухдалди на, яд гана хъваз.
«Ахвайш!» - лугьуз, кутаз зурзун.


Девир -девран хьанва алат…
Агьилвилик тирт1ан галат,            
Ц1игел хьуни хгана къуват,
Камар ягъиз, атана зун.


Эзерет* я  кумай агьвал,-
Кьур акъатун жезва мукьвал.               
«Гьайиф булах…» гъиз и мисал,               
Чи рик1ера,  амукьда вун.               



Ц1уру хуьруьн мулкунал кис
Хьана, ама к1ул хьиз  экъис.
Пагь, са кьадар, Фикретаз пис
Хьана, акваз  гьал ви «яхун»…

2016 й.

* Лигъ – уьленра жедай векь
*Кутар – гъвеч1и хъенч1ин квар
*Цц1вел – 10-12 йисан гада-аял
*Эзерет – лап т1имил, куьтягь жери