Дидедин рикl Сердце матери

Гьикьван къене хуьда дердер,
Гаф акъудна лугьуз тежер,
Рекьел алаз назик вилер,
Велед рикlел фидан мегер.

Рикlяй физва шумуд хиял,
Варцаз кlанда гъетер къвалал,
Ракъини  хьиз цавун юкьвал,
Ракъуриз на  нурар яргъал.

Ви умудар михьибур я,
Веледрихъ рикl кайибур я,
Вегьез чирай на чаз камар,
Виридалайни къенибур я.

Яргъи йифер, ахвар такваз,
Кьепlин кьилихъ ацукьдай вун,
Билбил мецел ширин рахаз,
Экв жедалди амукьдай вун.

Чилерилай цаваралди,
Алцум жедач дидедин нур,
Эмир я квез, чан балаяр:
Хамир куьне дидед хатур.

Дидед къамат балад кьилел,
Лув гузвай са кард яни вун,
Алайди туш гьич и чилел,
Иервилиз марвард яни вун.

Ви зегьметдиз авач кьадар,
Хцаб жедач авур крар,
Диде гьардан язва лувар,
Нур аватай экуьн ярар.

Дидед кьилел кlватlмир цифер,
А циферихъ къай галайд я,
Нагъв такуй квез назик вилер,
А накъварихъ гьарай галайд я.

Чи дидеяр, чи къелеяр,
Рикlин къене чун хуьзавай,
Я дереяр, я тепеяр,
Яргъаз твах чlал за кхьизавай.