Хуьруьг Лукьманаз

Кьвалун кьилел шагьвар алай, секиндиз
Кьвези са кас ацукьнава айвандал.
Хиялариз вилер ала, йигиндиз
Къугъвазавай къузай пата балк1андал.

Лацу шивдин, бахтавар яз, ч1уравай,
Къайгъусузвал гьакъикъатда сир я хьи.
Фикир гайт1а начагъ рик1из хуравай,
И азадвал гьайвандин таъсир я хьи.

Чи руьгьериз хас я лезет, ширинвал-
Авам кас я намусдикай азадди!
Вуч гуьзел я гьайвандин архайинвал,
Бахтлу аям эрзиман я мураддин?

Вучиз Шаир, ви деринра гъам ава,
Хиве кьазва тагай азаб Халикьди?
Виридаз хьиз вазни гьа са дам ава;
Герек яни ви азабар фасикьдиз? ...

Ажиз хьанвай туп1ар физва къаламдал,
Фикир тагуз чанда авай дердериз.
Ц1ар кхьизва вилер алаз аямдал,
Рик1е авай гъамарикай бендериз.

Вуч хийир я, низ чида и макъамда?
Гьамга хьиз руьгь ажугъдикай азад я!
Герекни туш гекъигнарун гьарамдав:
Ич1и руьгьдиз ягълу кабаб мурад я.

Белки имай жаза жеди гъуцари
Багъишнавай вичин аслу лук1вариз.
Тахьайт1а мад вучиз экуь ярари
Кинарзава шаир, такъуз ахвариз.

Тахьайт1а им тийижир савкьат яни,
Тухузва намусди вичин жигъирдай.
Тахьайт1а им эхирдин къамат яни;
Азабар гуз к1анивиляй, хийирдай.

Гьик1 ят1ани, шаир вичин рекьелла;
Шем куьк1уьриз, кьил акъудиз мич1ерай.
Гьакъикъатни керчек гьамиш мецелла,
Тади ийиз фагъирд патав, эверай.

Масад ава тухуз уьмуьр к1анивал,
Къеневайди вичин са агъдабан я,
Чир тахьана я дугъри, я къенивал.
Айиб авач, амайни са инсан я. ....

Шагьвар къекъвез, кьвалун кьилел секиндиз
Кьвези са кас ацукьнава айвандал.
Къузай пата чукурзавай йигиндиз,
Вилер ала адан лацу гьайвандал.

Фикирна за, низ герек и зегьметар;
Парабуруз акьул, фикир чара я.
К1ани кьвадар авурт1ани гьуьрметар,
Амукьда вун мадни уьзуькъара яз.

Гьавай я жал и азабар фагъирдин?
Халкь паталди экуь дуьнья сур хьанай.
Атай ч1авуз  и хиялар фикирдиз,
Зи гуьгьуьлар акваз-акваз ч1ур хьана.

Саиданни кьве вилни барбат1 хьанай,
Кьил къакъудай ч1авуз усал дустари.
Имайни чаз са ужуз къамат хьана.
Вуч гъидат1а мад чи кьилел гъуцари.

Зигьин авай шаирдал бугьтан къведач;
Адан кьисмет гьял авунва гъуцари.
Гьарам кардал хийир, баркаван къведач;
Шукурзава, килиг ийиз цавариз.