***

ВУЧИЗ

(Часпар - *часпархана циклдай)

Вич са азад ял-гьава,               
Гьак1 секин ахвар,               
Игьтиятрин я арха,               
Уьлквейрин часпар!               


Часпар меслят-терез я
Тегъизвай  гьуьжет.               
Ислягьдак1аз, халкьарин,
Гьялзавай кьисмет. 


Кьисметнава чи халкьдиз
Часпар нягьс, бедлем.
Нагьахъдаказ пайнаваз,         
Хъел гъизва бегьем!



Чун са махлукь  хьуникай,               
Такъуна хабар,
Вуч патал кьве уьлкведи,
Туханва часпар?!


Вучиз халкьдиз ттабнава -
Часпар жеда экуь!..
Ша, атана, килига,
Кьве вил хьуй буьркьуь!


Вучиз к1евна, жуфтдак1аз,      
Симерив цацун,
Гьам кьибле, гьам кефер пад
Чи Кьулан вац1ун?


Вучиз гъуьргъуь авунва               
Мукьавал халкьдин ?
Вучиз чи рехъ салнава
Часпар завалди!


Вучиз  авач къайгъуяр
Махлукьдиз герек:
Эляч1ун хуп1 четин я,   
Жезва хьи гьелек!               


Вучиз вахт-югъ къакъудиз,
Гьатрай чун гужа,
Дишегьли галай аял,
Жегьилни къужа?


Живедикни марфадик,
Чанда мекьни - фул.
Гатузни, азгар йикъан,
Зегьемдин гъул-гъул.


Вуч паталди авунва
И завал несиб?
Лагь, ни хуьрай и халкьдин
Эркни таъсиб?


Гьикьван жеда и куькве -
Ч1угваз таб - азаб.
Халкь пайнавай кьве  уьлкве,
Це  кван чаз жаваб?!


«Вучиз, вучиз…» амайкьван -
Хъсан жедач  гьал…
Къастуналди халкь паюн
Я хьи чиркинвал!


*Часпархана - таможня

  2007 й.               
Гъилин хат1арин дафтардай