Са инсандин...

Са инсандин, югъди негьякь гелевай,
Ч1ехивалун лап кьилин хиял хьана.
Гьекь алудиз капашдивди пелевай,
Хажалатдик акатна, бейгьал хьана.

Вич вине ун амал гвайдаз четин туш;
Зат1 туширдаз куьз герек я къугъунар?
Гьакъикъатда лагьайт1а - им кк1ин туш;
Къузгъунарин я гьак1ан им уюнар.

К1ват1на ада мугьманар са сеферда,
Эвер гана фекьидизни хуьревай,
Сивелай мез элягьиз са тегьерда,
Ацукьнавай, балугъ хьтин виревай.

Фекьидини, хабар тушиз са к1усни,
Темен гана, кьуркьандин чин ачухна.
Муькуь патал ацукьнавай чи дустни,
Агъур къванер кьулахъ вичин чуьнуьхна.

"Аминь!" лугьуз, гъилер гьеле винемаз,
Иесиди лугьузва, кьар ктадиз;
Пара вахт тир к1ват1ай агъу къеневаз,
Башламишна фекьид кьилел алтадиз.

-Инаг ч1уру, анаг кьадарсуз хьана;
 Гъалат1ар кваз к1елар авун гунагь я!
Мадни ч1урук1 рахаз, гьаясуз хьана,
Амма фекьи чукьни тийиз ислягь я.

Ахмакьбурун кьил такъунни хъсан я;
Ширин я и дуьньядал архайинвал.
Амма къумир рик1елай- вун инсан я;
Эх ийимир негьякь амал, чиркинвал.

Зегьердин кьил т1ат1айт1а ам вац1 жеда,
Багьна к1ани ахмакьариз темягь яз.
Намусдинни юкьва бегьем к1ац1 жеда,
Гьа иналди итимвални куьтягь я.

Цавун аршдиз акъатай са кьегьал хьиз,
Вичи вичин амалдалди дамахиз
Ацукьнава иеси са аял хьиз,
Мугьманрикай, дустарикай даяхиз.

Дуьз лугьуда- сив рахадач угъридин,
Патав кьегьал, намус гвайди хьайит1а.
Гьайиф хьи, мензил куьруь я дугъридин
Намуссузрин арада ам хьайит1а.

"Заз вуч ава!"- кьил чуьнуьхиз ч1акара,
Булушкадин этегдин лап к1аник физ.
Эцягьайт1а лапаткани япара,
Язухдаказ къвазда ам малаик хьиз.

Малаик хьун, шакни алач, хъсан я;
Гьар са ч1авуз гьар са карни вине я.
Гьар келима, гьар кьадамни кьакьан яз,
Адан абур, адан къилих чешне я.
      
             ...

Куьтягь хьана, межлисдикай дад къачуз
Гьаятдава ярар-дустар, мугьманар.
Дамахар гваз, фекьи авурди агъуз
Килиг ийиз, вич вичел я гьейранар.

П1уз эвисна, вирт алахьиз мецелай,
Килигзава иесидиз кьегьалар.
Иесидин, хъвер алахьиз сивелай,
Физва цавуз вирт1еди кьур хиялар.

Физва йикъар, т1ям хкатда са кардин;
Маса са фенд арадал гъун герек я.
Мукьва жезва къе-пака мад суварни,
Алчах инсан алчахвилел зирек я.

Садра вац1ай яд хъуналди тух жедач;
Халкь авунва яд гьамиша герек яз.
Узгъундиз гьич са шейни артух жедач;
Узгъунвиляй ам гьамиша зирек я.

Ван хьанат1а, Балашахъни кац авай,
Тагьиразни чидай адан угърашвал.
Элигайла машадални яц1 авай,
Мад чуьнуьхиз недай къатух капашдал.

Каш эликьай жанавурни ислягь я,
Киц1ни гьавайда герексуз элуькьдач,
Са инсандин нефс шегьре хьиз фирягь я;
Кьейит1ани, са к1усни ам эликьдач.
          
            ...

К1ват1на яр-дуст, ацукьнава суфрадихъ
Иеси мад, галаз мирес-вирисни.
Сифте фекьи усунарна кьарадив;
Кьвед лагьайдаз эвернава межлисдик.

Кьвед лагьайди Аллагьди лап гайид тир,
Кьам, лагьайт1а, иесидлай гьяркьуь я.
Вични пара мавлидарик хьайид тир.
Акьул тахьай иесини буьркьуь я.

Куьк як1ун дад сиве амай чакъалдин
Мукъаятвал жеда т1имил ахвара,
Мадни лугьун- узгъунчидин, нахалдин
Гьекь акъатда ксай ч1авуз хъваларай.

Темен гана,кьуркьандин чин ачухна,
Ширин, гуьрчек сесинив к1вал ац1уриз.
Иесди мад вичин саягъ къудухна,
Эхирдиз кьван эх тахьана, ахмуриз.

 -Гъалат1ар кваз к1елирди вуч фекьи я?
  И саягъда к1ел авун са абур туш.
 -Я стха, зун са т1имил кьван буьркьуь я.
  Буюр, к1ела. Вазни и кар агъур туш.

Ктаб гъиле кьуна, мет1ел эцигна,
Инхъа-анихъ, анхъа-инихъ элкъуьриз.
Акъат тийиз кьил, хат1ариз килигна
Ацукьнава ам, каци хьиз мурмуриз.

Мягьтел хьана ацукьнавай мугьманар
Хиялариз; идан метлеб вуч ят1а!
Ачух хьана табни-гьялле, бугьтанар,
Чир хьана гил карди себеб вуч ят1а.

Гьар жуьредин дуьшуьшар чахъ пара я,
Пара жезва юхсул хпер- ялтахар.
Тахьун патал чи к1вал карвансара яз;
Абру чка язва къацу яйлахар.

Мукъаятвал ая жуван намусдал,
Чубанвализ к1анибурни пара я.
Садаз мукьва лугьуз, садаз зи дуст кас,
Тахьурай чи уьмуьр гуьнуькъара яз.