Къарагъ вири, чlал хуьн чна, лезгияр!

Зи лезги ч/ал, дидедин ч/ал, хайи ч/ал,
Дидед нек хьиз хайи къалай дадмишай.
Сифте"Диде"-гаф зи мецел гъайи ч/ал,
Багьа савкьват я  Аллагьди багъишай.

ГЬа нек/едихъ галаз фена дамарриз, 
Бедендини кужумна хас иви хьиз 
Кьеп/инамаз яб гуз дидед лай-лайриз,
Гьисс авунай за ч/ал гьуьл,зун гими   хьиз.

Гьуьлуьн гужлу лепейрилай мягькемдиз,
Сирнав ийиз тунай ч/алан къудратди.
Лезги лугьуз дамах ийиз уьтквемдиз,
Завалрикай хвенай  адан къуватди.

Гзаф ч/алар ала гьелбет, дуьньядал,
Виридалай зи ч/ал гуьрчег, масан я,
Ч/алаз къимет гузва за зи дидедал,
Ам сифте яз завди рахай инсан я.

Амма гьайиф,чи аманат, хайи ч/ал,
Хасаратдик акатнава къенин къуз.
Кьуранва мез ,на лугьуди хьанва лал.
Ч/ал гьайифдиз, жезвай къвез-къвез къуватсуз.

Бедбахтвал я им чи къвезвай несилдиз,
Куьч жезавай туна хайи ерияр.
Квахьзава ч/ал ,ша куьмек гун эвердиз,
Къарагъ вири ,ч/ал хуьн чна ,лезгияр!!!