Ч/ехи буба , шииратдин бине чи,
Хазинадин дагъ багъишай несилриз.
За фикирра туна суьрет ,къамат ви ,
Алахъзава зунни ви рехъ давамриз.
Элкъуьрзава за йисарни кьулухъди,
Твазва ви руьгь зи ц/арарин бейнида.
Гьахъвал к/андай, зунни туша чуьруькчи,
Гьахъсузвилив тваз тадач жув есирда.
Йисар фена вишералди гьисабиз,
Жавагьирар ама халкьдин мецерал.
Ви " Туьквезбан"-аваздалди тамамриз,
Кьуьлерзава ви несилри мехъеррал.
Хуьруьн юкьвал кьил хкажна такабур,
Акъвазна тик кьабулиз чи саламар.
Етим туш вун! Гзаф хьанва мукьвабур,
Руьгь шад ийиз алахънава рухваяр.
Эмин, вакай хуьр хьанва къе ,лап ч/ехи,
Вун чи буба ,чунни я ви невеяр.
Ваз женнет гуй, чаз къуватар Аллагьди,
Мягькемардай шииратдин къелеяр!
Чlехи буба
© Copyright: Фатимат Османова, 2021
Свидетельство о публикации №121091401089
Свидетельство о публикации №121091401089
Рецензии