Халкь сагьиб ийида...

Кьакьан тик  кукIушри Афгъанистандин,
Гьар чIавуз гьакимар чIугнава вичел,
Миллетди  хуьзва ягь, намус  макандин-
Галатнач йифни-югъ  хьуникай  кIвачел!

Шумуд империя атана винел,
Шумудра гьахъ -нагьахъ ина какахьна...
Шумудан пер хана дагъларин синел,
«Кьиникьдин чуьллера»*   «умудар квахьна»**

Садбур таб рахана, тIунутI къалуриз-
Мал-девлет паталди нефсер  къати я!
Садни гъиз алахъна такабур чилиз,
Гапурдин кIуфаллаз  «демократия»...

Гьикьван мад авахьда ивидин вацIар,
Чидач, ислягьбурун тахсир вуч ятIа?
Лагь, бес ни сагъарда  рикIерин кьацIар-
Тарихди залумрин къимет гудатIа?

Эгьей,  секиндиз  тур афгъанрин  накьвар,
КIанзавач садазни  агъайрин паяр!
Бес тушни аялрин, таватрин  накъвар-
Алуда  и чилин  кьилелай  цIаяр!

Инсан муьтIуьгъ жедач, кесиб я лугьуз,
ЛукIвилер   авачтIа дамарда, танда,
Йисари  рекьида зулум са юкъуз-
Халкь сагьиб  ийида вичин ватанда!
______________
*
** Афгъанистандин баябан чуьллерин тIварар