***

ГУМА  ЗАВ

Ништа гьикьван, гел амачиз,               
И дуьньяда квахьна ч1алар.               
Ч1аларив сад, къайгъу такур,               
Къадир тахьай, ажуз халкьар.               
               
                .               
Камал дерин, дуьнья кьат1ай
Чи бубайрин ч1ал гума зав.
Сурвал авай, элиф квахьай,
Ч1алан нефес -  ял гума зав!


Акъуд тахьай, деринравай,
Ч1алан дувул-пун  гума зав.
Къакъат тахьай - диб садзавай,
Нугъатрин-рахун гума зав.


Рекъин тийиз, ифин ийиз,
Ч1алан чимни, нур гума зав.
Жидайрикай кич1е тахьай,
Чи мазанрин хур* гума зав.


Ч1алаз талукь кхьин алай
Хенжелдаллай кьац1 гума зав.
Эсер ийир келимайрин,
Ч1уриз тежер, хат1 гума зав.
               

Гьич садазни муьт1уьгъ тахьай,   
Ч1ал къекъвезвай, чил гума зав.               
Чилин винел хайи ч1алан
Дагъни, аран, гьуьл гума зав!


«Ч1ал квахьда гьа, иес тахьай…»
Гай насигьат – кьин гума зав.               
Ч1ал хуьн патал, т1алаб  авур,               
Бубад  руьгьдин кин гума зав. 


Фикрет ава  насигьат гуз -               
Ацукьна хва, хтул патав.
Деминава  хайи ч1алан…
Туьхуьр тийиз  гургу - ялав.
                .   
2011 й.
Гъилин хат1арин дафтардай

*Хур - хуралай лугьун (мани, тесниф …)