Батирайлис

Батирай – дарган далай,
Даршдусмазиб буч1уси.
Батирай – дарган деза,
Наслума хъумх1ертуси.

Батирай – рух1ла давла,
Даргантас харжбарибси.
Батирай – ях1ла къала,
Даимдешлис белшунси.

Чугур бирхъуси пагьра,
Далайэс устадешра,
Дурх1нани г1ерисули,
Калаб х1ела, Батирай!

Калаби х1у, Батирай,
Адамтала урк1базив,
Каммайаби, Батирай,
Дуч1ути х1ябкубтазив!
Батирай

Г1яйша Кьурбанова

Сецад х1урматла адам вири вара Батирай, эгер XXI ибил даршдуслизив ак1убси виалри?! Сунела замана илиск1ун цалра композиторли макьамти цалах1едяхъиб (илди сунени пикридирутири), цалра оркестрли илис агурби х1едяхъиб (асубирар, Батирайлис оркестр ибси девра аргъес имканх1ебак1иб биэс), цалра авторли илис х1ядурти х1ябкубти гьалах1едихьиб.
Батирайлис даргала поэзияла дудеш или иру. Илк1ун поэтцун ах1енри.  XIX ибил даршдуслизив х1ериубси илис сунела урк1или макьамти г1ердури. Х1ебиалли илис нуша макьамти цаладирхъян яра композитор дик1ес дирех1е.
Леб бахъал авторти, чунира назмурти делк1ес балути, амма цалра тугъ далайличил белч1ес х1ебирути. Батирай биалли мурхьси мяг1нала назмурти цаладяхъили паргъатх1ейрину, илди далайличил делч1и, адамти х1ясратбири. Х1ебиалли илис нуша даргала литературала классик ва машгьурси далайчи (г1яртист) дик1ес дирех1е. Илх1елира, гьаннала далайчибиван ах1и, матъал далайик1уси, къиянти х1янчили бамсахъурти адамтала урк1би шаддируси.
Дунъяличиб машгьурбиубти гьаннала поэтунани г1ях1цад гонорарти кайсули сари. Батирайли, сунени ак1ахъубси поэма ва мекелли дахъал назмурти чеалк1ути наслубас матъал г1елар датур. 
Къиянси замана х1ериуб Батирай, х1ябкубти дуч1ни багьандан г1як1алаируси, далайик1ахъес къадагъабируси, поэт виъниличи пахру барес имканх1ебак1ибси.
XXI ибил даршдуслизиб х1ербирути г1яртистунала, назмула ца тугъ цалабяхъес х1ебирули биалра, далайбик1ес бирни багьандан халкьли халаси х1урматбирули саби. Х1ебиалли XIX ибил даршдуслизив х1ериубси, сунела жагаси т1амаличил даргала халкь чуйнара х1яйранбарибси Батирайла нушани гьат1ира халаси х1урмат барес г1яг1нили саби.
Батирайлис гьалаб, иличил барх х1ербиубти адамти чихъали сабил нушани балули ах1енра. Амма илала пагьмули х1яйранбарибти адамтани, наслулизибад наслулизи бурули, ах1ерли бих1ибси творчестволи нуша ишбарх1ира тамашадирахъулра, иличи челис-че пахрули дирц1ахъулра.
Илала пагьмула мурхьдеш ва бяг1удеш саби Батирай хъумх1ернилис ва халкьла урк1урбази минавиубли калнилис сабабра.