Стхадиз кагъаз

Ширин стха,к/ела вуна зи шиир,
Зи гафари ийин белки ваз тагьсир,
Чир хьун патал ваз ви уьмуьрдин къадир,
Дикъетдивди гьар са ц/арц/из це фикир.

Вил вегь стха и экуь тир дуьньядиз,
Тахсирлу яз килигмир вун гьижрандиз,
Тухумир на жуван уьмуьр пашмандиз,
Це рик/ин сир, азаб гумир ви чандиз.

Гьисаб стха,шумуд хьанва ви йисар,
На ви уьмуьр авунва вакай бизар,
Гьар инсандихъ гала са т/ал, са азар,
Фикирдиз гъваш гележегда къвезмай къар.

Вун хьтинбур ава хизандин юкьва,
На ви уьмуьр ракъурзава бад-гьава,
Килиг стха, пашман жеда вун ахпа,
Хкудур на зи гафарикай  са мана.

За акьул гуз вунни туш аял шазан,
Чизва вазни ви уьмуьрдин пис-хъсан,
Авачир захъ маса мурад ,эрзиман,
Хьанайт/а вахъ туьк/вей
к/вални, са хизан.

Виридаз хьиз зазни стха я ширин,
Акваз к/ан туш заз сефилдиз мад ви чин,
Цийиз мехъер ийидайвал хьухь к/вачин,
Къуй бахтуни квезни гурай экв вичин!

 1993-йис(Стхадиз зи ван атана,адахъ хъсан хизан, к/вал-югъ вири хьана)