***

КЦ1АРА


Кц1ариз хтана, ц1инин гатуз,
Саки пуд къуз за ял яна.
Шегьердин иервал кьат1уз,
Зи илгьамдиз "т1ал" яна.


Хтай  юкъуз "гъуьрче" хьана,-
Акун патал  къамат михьиз.
 Къекъуьн тавур куьче хьанач,-
 Жедай крар акуна тийиз...
 


Пакад юкъуз, теклиф аваз,
Зун, мукьвадан, мехъерик квай.
Лезги макьам, чкай аваз…
Жегьилар худ кьуьлерик квай.



Муькуь юкъуз  *"Пачагьдин багъ"
Паркуна за къекъуьнарна.
Гьа ина за,  ягъна хьиз  *т1вал,
Юргъунвални   секинарна.



Гьелбетда хьи, нукьсан квачир
Я хуьр жедач, яни шегьер.
Алахъда нукъсан хкудиз
Махлукь рази жери тегьер.




Амма герек крарикай
Чуьнуьх хьайт1а, жедач уьзягъ…
Аквада, гьик1 хьайит1ани,
Къекъвейт1ани, гвачиз чирагъ!



Тагайт1а, заз жеда гунагь,
А  крарикай, тек са суал:
-Лайих чкадал вучиз алач,
Т1варар, ц1арар... дидед ч1алал?!.



Шегьердик квайд аямд чагъ я,
Уьмуьр я чи, физвай вилик…
Кц1ар, вун зи  дамах, рагъ я
Даим нур гурай ви  чили!



Кц1ариз хтай, ц1инин гатуз,               
Гьал  бубат тир,  яна за ял.
Гьисс авуна, хъфидайла,
Шегьердизни янава цвал.


1.*Са вахтара, алай аямда Н.Нариманован т1варцихъ
галай паркуниз,  «Пачагьдин багъ» лугьуз хьанай.
2.* Т1вал – узел, т1вал ягъун – завязывать


2009 й.
Гъилин  хат1арин  дафтардай