БЯСКОНЦЫ ПАЛЁТ У НЮ ЁРК
Леанід Пранчак
Мы разам толькі ў снах.
Ад болю сэрцу горка.
Я заказаў білет
Ад Менска да Ню Ёрка.
І вось каторы год
Паміж мацерыкамі
Мой доўжыцца палёт,
Як бездань, паміж намі.
Паміж табой і мной
Бясконцаць кіламетраў,
Заходзіць сонца і
Халодны дождж імжыць.
А для мяне кахаць,
Як удыхаць паветра,
Як з цемры небыцця
Падняцца і ажыць.
РастАе, як смуга,
Маёй надзеі пёрка.
Сумненняў акіян
Ад Менска да Ню Ёрка.
У горле даўкі ком,
Шчымлівае спатканне.
І ўсё здаецца сном.
Усё, апроч кахання!
Паміж табой і мной
Бясконцаць кіламетраў,
Заходзіць сонца і
Халодны дождж імжыць.
А для мяне кахаць,
Як удыхаць паветра,
Як з цемры небыцця
Падняцца і ажыць.
Журба мая — змяя,
Цудоўная акторка.
Без даты мой білет
Ад Менска да Ню Ёрка.
Пара даўно рашыць...
А я ўсё не рашуся.
Асколкамі душы
Параніць вас баюся!
29.06.2021
Бясконцы палёт у Ню Ёрк
© Copyright: Леонид Пранчак, 2021
Свидетельство о публикации №121071403842
Свидетельство о публикации №121071403842
Рецензии