Цаварай рахадай,вич алаз чилел,
Тарифар ийидай гъил тухуз рик|ел,
Лавгъвавал таб алай гьамиша мецел,
Инсанар хуш туш хьи,дустар,зи рик|из.
Чир тежер авунвай гьуьрметни хатур,
Ч|агуриз алахъдай вакъиа такур,
Дуьньядал зун шагь я,-гатазвайбур хур,
Инсанар хуш туш хьи,дустар,зи рик|из.
Мецелди рахадай винелай верц|и,
Кьулухъай дабандиз к|ас ядай къучи,
Инсафсуз хесетрин,рик| ч|улав вагьши,
Инсанар хуш туш хьи,дустар,зи рик|из.
П|узаррал хъвер алаз,сарари ат|уз,
Халкьарив гьуьжетдай вич хан я лугьуз,
Гафуналд гъил ийир мурз алай як|уз,
Инсанар хуш туш хьи,дустар, зи рик|из.
Девлетда тунавай гьамиша вилер,
Пулунихъ дидени гудай,кьаз кьинер,
Гьа гъвеч|и рик|ера цанавай зегьер,
Инсанар хуш туш хьи,дустар,зи рик|из
Алчах тир мецери турунал гъида,
Экв квахьай вилери ц|аюнал гъида,
Кьадарсуз невсери кьурунал гъида,
Инсанвал хуьз алахъ,хуш жервал рик|из.
Хуш туш рикlиз
© Copyright: Фатимат Османова, 2021
Свидетельство о публикации №121062904665
Свидетельство о публикации №121062904665
Рецензии