Рэжым вынiшчэння

Аўтазакі, каты, краты --
Людзі ў чорных балаклавах...
У СІЗА -- паўсюдна маты
І няма вады з-пад крана.

Мы ў рэжыме вынішчэння
Беларусь сваю гукаем.
І жадаем ачышчэння,
І вясны над родным краем.

"Правасуддзе" -- бы канвеер,
На якім за думкі судзяць.
Ад судоў атрутай вее --
У судах не стала суддзяў.

Дыктатура круціць жорны:
Нішчыць вольных беларусаў.
Белы колер стаў тут чорным:
Паказанні -- пад прымусам.

На падлогу льецца хлорка --
Удыхайце водар волі.
На сняданак -- хлеба корка,
А да коркі -- пачак солі.

Карцар, камера без ложка,
Дзе святло не гасне ўночы.
Ні матраца, ні рагожкі --
Ёсьць паўсюль аховы вочы.

Гэтак здраднікі Айчыны
Ў людзях волю вынішчаюць.
І прыдумваюць прычыны,
Каб не даць да коркі чаю.

У вачах усёй сістэмы
Страх жыве з пачатку года.
Льюць хлусы з экрана тэмы --
На хлусьню ў краіне -- мода.

У канвульсіях рэжыму
Стогне дзень і стогнуць ночы.
Ад вясны набраклі жылы --
Здрада мае позірк воўчы.

Штосьці ў ім -- з радні шаленства:
Тыдзень, два, -- развязка хутка.
Беларусь: мая нявеста
Вымярае долю ў сутках.

02.04.2021. Заслаўе