Багьа я заз

Зи лезги ч/ал зи бахтунин куьлег я,
Гъиле вугай уьмуьр гьалдай кьенерар.
Зи хайи ч/ал заз фу, яд хьиз герек я,
Яратмишиз куьмек гузвай эсерар.

Сифте гаф я чир хьайиди "диде" заз,
Гьа диде хьиз багьа я заз ч/ал хайи.
Ахпа лай-лай,дидед ягъай аваз заз,
Рик/е ама зи умудриз мал хьайи.

Бубайрилай амукьай ирс, ядигар,
Ч/ал багьа я, заз бубадин бап/ах хьиз.
Ч/ал зи мез я, ч/ал зи иви, хесетар,
Гьавиляй за кьазва ам зи даях хьиз...

Ч/алан дамах тушни мегер Саид чи,
Муьт/уьгъ тахьай пехъи хандин туруниз!
Лезги хва я, Лезги чилел хайи чи,
Дурум гайи инсафсуздан зуруниз.

Эминани вичин гуьзел рангарал,
Безетмишнай чи ч/ал, гуьрчег гебе хьиз.
Лезгидин сес хкаж хьанвай рагарал,
Къагьриман хва Шарвилидин неве хьиз.

Сулейманни билбил хьана Куьредин,
Машгьур хьанай къад асирдин Гомер яз.
Лезги хци гьар са пип/е уьлкведин
Тариф тунай, ватанни ч/ал вине кьаз.

Зун лезги я, ч/ал зи кьилин дамах я,
Дегишдач за везин, гьич са гьарф, лишан.
Зи лезги ч/ал, Шалбуз дагъдин булах я,
Адан гьар са ст/ал жеда заз дарман!