Мая планета - дзесяць сотак раю.
Садок: парэчкі, вішня, пара сліў,
Каравая антонаўка старая
І неба - сіне-сонечны разліў,
Як вокам ахінуць - ні дна, ні краю.
Пяшчотна-саладкавы водар тонкі
Плыве - чаромха недзе расцвіла.
Ужо брыняюць бэзавыя гронкі,
І ў пырсках залацістага цяпла
Руплівы май купае баразёнкі.
Няхітры опус у чатыры ноты
Развучвае старанны шпак-пяюн.
Цяжар нуды зімовай і ляноты
З плячэй далоў пад звон чуллівых струн
Гаючае вясковай адзіноты.
Ружовасцю півоні ўспыхне лета
І дзятлавін рассцеле дываны.
Запахне мёдам поўдзень перагрэты.
А сёння п'е густы нектар вясны
Мой рай, мая маленькая планета.
Мой маленькi рай
© Copyright: Клавдия Семеновна, 2021
Свидетельство о публикации №121052003417
Свидетельство о публикации №121052003417
Рецензии
Дзякуй за прыгажосць Слова аб маленькай планеце, Клаўдзія Сямёнаўна!
Такім прыемным напамінкам было маміна слова "дзятлавіны", "дзяцельнік"!
З Новым годам і новымі вершамі!
З цеплынёй,
Ядвига Довнар 03.01.2023 13:29 • Заявить о нарушении
Такім прыемным напамінкам было маміна слова "дзятлавіны", "дзяцельнік"!
З Новым годам і новымі вершамі!
З цеплынёй,
Ядвига Довнар 03.01.2023 13:29 • Заявить о нарушении
На это произведение написано 5 рецензий, здесь отображается последняя, остальные - в полном списке.