***

АТ1УМИР  ВИЛ

(Гъурбатдиз  акъатай
ватанэгьлидиз)


Гъуд кваз рекъвек ацукьнавай
Вун, шикилрай хъхьана чир.
Авай чка къариб уьлкве,
Вич са гъурбат, умун тушир.



Хкуьрун тахьуй гевилдик ви,
Гьа и кьиляй за ваз лугьун:
Гьикьван кьурт1ан на вун циц1и,
Азият я гъурбатда хьун. 
               
 

Чир жедайвал сефил я вун,
Атанвай хьиз кьилел гъаза.
Ни мажбурна вун анра хьун…
Дагъ, аранди…  ганан жаза?



За ваз гун са ихьтин суал:
Кесиб тирни ватандин чил?
Кваз такъун, ви кар я усал,
Берекат квай, дагъ, аран, гьуьл! 



Уьмуьр гьалун тирт1ан четин,
Рик1е къаст хьун, виневал тир!
Чи бубайрин уьмуьр секинд
Хьанач, ватан - биневал тир!



Гъурбатда вердиш хьун патал
Ваз гзаф вахт жеда герек.
Агьвал дегиш авун патал,
Такьатди вун ида гьелек.
               


Тахьун патал вахъ сугъул гьал,
Жувандахъ вун жеда къеквез.
Ихтилатун, дидед ч1алал,               
Хъуьтуьл  хьун я гъурбатда мез.



Вахт алатурдивай, ана,
Ч1ехи  жеда уьмуьрдин яш.               
Рик1ел хквез хуьр, к1вал, ака,-
Ц1игел гьалди гъида вахъ каш !
 
         

Гена хъсан, аям  къулай
Шарт1аринд я, – жезва хьи зенг.
Мукьва-кьили, хуьр аквадай
Тадаракар хьанва къе генг.



Гьар вуч ят1ан, гъурбат я ам…
Мензилралди яргъал тир чил.
Такурай ваз гъуссани гъам,
Ватандивай  ат1умир  вил!


2003 й.
Гъилин хат1арин дафтардай.