Ягъунар

Ракьун гапур гваз гъилера
КIватI хьанва чи хуьрера
ВикIегь чан гвай лезги хваяр
Гуз кIанзавай рикI хуравай
Чилер патал гьар са ч;авуз
Кьил садрани тавур агъуз
Гъилер тIарам, акьул михьи
Ргаз ава лезги иви
БалкIанарал акьах ийиз
Кьуьл ягъазвай кIевиз чилиз
Гьазур къвазнава йигин шивер
Зурзурардай кIаник чилер.
Чи дугунда кIват; хьанавай
Ван душмандин чаз атанай
Кьуна гъиле кьенер кIевиз
Хкаж хьана кIеретI виниз
Пелен кукIвал, вуч акуна
Пуд агъзурдал кьван кьушунар
Гьазур жезва женгер чIугиз
КIанз чи кIеви сенгер чIуриз.
Алай чка чир авуна
Турар гъиле кIевиз кьуна
Звериз гузва шивер вилик
Азадвилни кузва вилихъ
Алчударна кьенер гъилик
КIанзава ягъи акваз чилик.

Акун кумаз душман пехъи
ЦIай кутуна адан кьилихъ
Иви авахьна вацI хьиз физва
Гъиле гьатзавайбур рекьизва
КIевиз ягъунар гатIумна
ЧIемерукра хьилер туна
Ахъай ийиз сад-сад абур
Фад алабарзава атайбур
Чи чилерал кьацIай кицIер
Авардарзава чIулав вилер
ТIарам гъили кьил атIузва
КIеви гъутув тIиш чкIурзава
Кисзава гапур гьакI ртариз
Хьелни акIизва хурариз
Сад цIвагъзава кIвач амачиз
Муькуьд кисна кьил гумачиз
Ягъунарни акъваз тийиз
Кьенвай ксар жезва ктIиз
Хаз кIарабар, гузва кьуьлер
БалкIанари падзава кьилер
Чилер хайи чи кьаз атанвай
Гила кьена мез тапанавай
Ярх хьанава чилел вири
Яд хьиз хъвазва накьвад иви.
Кумукьунар мукьвал аквазвай
Чанни  чпин пара кIанзавай
Кат авуна душман кьулухъ
Ягъазмачир рикIни хурук.
Кьвепатайни пара кьенва
А дуьнедиз камна фена
Гьикьван викIегь лезги рухва
РикI ягъазвай кIевиз хура
Хуьн паталай хайи чилер
Гапур кьуна чпин гъиле
Цавуз абур хкаж авуна
КичIевал рикIяй алудна
Фин авуна душманд винел
Гатун ийиз къуьнер чилел.

Чаз ягъунар мад тахкурай
Садрани атун тавурай
Чи чилериз цIай кутазвай
Вилериз са шеъ таквазвай
Душманар, вилер ичIибур
РикIни мурк хьиз гьакI къайибур
Квез авачни жуван кIвалер
Вучиз кьазва чарад чилер?
Ван хьурай инай виридаз
Хуьда чна чи чил кIевизмаз
Ягъазмайкьван рик1 хурара
Аламазкьван хуьр сувара
Чи чил садавни вахгудач
Лезгивални чакай хкуддач
АкуртIани шумуд кIевер
МичI ийидач садран вилер
Къвезвай винел акваз душман
КIараб хада адан юкьан
Рекьидалди чун ккIида
Акьилел кьван ягъаз фида
ЦIай гъилеваз атай ягъи
Авадарда чими иви
Къайи чилел, муркад къурай
Гьар са касдиз чирни хьурай
МуьтIуьгъвал такIан я пара
Хьурай гапур акIиз хура
Маса ганвай вичин чилни
Буьркуь хьанвай авай вилни
Тапанарнавай чIалар хайи
Чи арада тахьуй лезги.
Къени жедай мад татайтIа
Тур гъилеваз гьич тахьайтIа
Чарад чилер кьазвай душман
Гьикьван жедай уьмуьр хъсан
Ласвилерни хуьн ийидай
Къенивална филик фидай
КIеви хъжедай кIиливални
Тижедай мад чIурувални
Хъуьрез аваз иер вилер,
Цуьк ахъайда салар, пелер.
Хайи чилер хвена кIанда
Аламазкьван рикI чи чанда
Хуьда жуван тIварни чилер
Дидед чIалал рахаз мецер
Къенивал чаз мад ахкъвада
Берекатдин къвалар къвада
ЦIийи ял гваз вил ахъайда
Чи чилерал, къвезмай сихил
Чирна кIанда гьар са жегьил
Жуван тарих, динни адет
ЧIав алатай, чIугун зегьмет
Жуван кIвачел къвазун кIевиз
Садвал хвена ийин виниз
Жуван тIварни, халкьни жеда
Къенивиле, эквер къведа
Лезги чилиз гуз чимивал
Хуьн ийида чна лезгивал.