Гьикьван жеда?

Гьикьван жеда чарад гъилик
Азадвилик хьанва гъарикI
Чарад тIаратI алаз кьилел
Акьалтдачни накъвар вилел?
Чун туширни викIегь лекьер
Зурзурарзавай кIаник чилер
ЛукIвал тавур са чIавузни
Килиг тавур са куьнуьзни
Къвезмай чIавуз кам ийизвай
КичIевални гьич течизвай
Хуьн ийизвай бубад чилер
Михьиз хуьзвай лезги хуьрер
Къе чкIана, амач, кьенва
Са къванери тарих хвенма
Парабуруз тижез хабар
Хана физва лекьрен лувар.

Гьикьван жеда чун тапарариз
Яб гуз ава гьакI махариз
Фагьумзавач авай йикъар
Сад-садан незва якIар
Кьве лезгиди, хьанвай чара
Чарад часпар акIай хура
Буьркьуь хьанва акван тийиз
Хкаж тижез гъилни виниз
Батмиш жезва кьарад къене
Акьул гвачиз вичин кьиле
Квахьна физва лезги рухва
Маса ганвай вичин чухва.

Гьикьван жеда чун ккIана
Гьинихъ-гьанихъ гьакI чкIана
Вилер мичIиз, акваз кIевер
АвуртIани кIевиз эвер
Ван тахьай кьасар ийида
Мезни лал я, яб биши я
Жуван чIалан ванни такIан
Жедач вакай хъсан инсан
Усал хьана, чин чуьнуьхна
Лезгивилин тIвар алудна
Кьуьл илисна фидай вилик
Хьурай ихьтин лезги чилик.
ЧIални гумач мецек хайи
Гьикьван жеда рикIер къайи?