Безам бац са къаяла мустафа ганижев

       БЕЗАМ БАЦ СА КЪАЯЛА         Мустафа Ганижев

Са-м дог дац, къаянна йоккхсаг хила,
Сона геттар из яхар эшашдац!
Базар т1а т1ормиг текхабеш лела,
Г1ажаца наха юкъе чакхюргяц

Са 1уйрена г1атта безам боацаш,
Сахалалехь боралаш 1ахалехь.
Даима хила, цхьа раьзайоацаш,
Айса дийцар юха дагадалехь.

Сона-м езац петар кий лелае,
Лорашка ухаш, никъбеш аз денна.
Хала ийчешка когаш текхабе,
Молхаш яьзъяь каьхат карадена.

Багар цергаш д1аяьнна со хила,
Оттадаь бердаш, бага къарст оалаш.
Бордаш диткъа  тайнаш хетадала,
Со хургъяц, даар бага ца соцаш.   

Сай мора коч, аз дукха лелаеш,
Къаьна кортле тула лелар дезац.
Уж атта бу бегаш ца кхетабеш,
Юха а ца хозаш, аз хотаргдац!

Уж, ийтт1а к1оажош сона сен эша,
Текха дег1 леладе со хьожаргъяц.
Мос к1айлуш, мордаш хобалур дайза,
Лазар ца1 хил ца 1еш, хилар дезац.

Мишта 1ергъяр, южа ха ца ларх1а,
«Телевизор Бай-Бай» – алар дицлуш?
Цхьа маллаг1а х1амах ца тоам бахьа,
Т1аккха г1айг1аеш, н1аб а ца кхеташ.

Са-м безам бац къаьна йоккхсаг хила,
Со хургъя кхалсаг ха яха дег1а.
Могаш, чаме, элегант я ала,
Дувха барцкъа, т1ехьа хила к1айг1а.

Дикка гаьна яха безам ба са,
Хулаш «нани» я ала талмаста!
Елаялар доаладеш, хил б1а са,
Духьал сайгар долчох, со т1аласта!

Са дошо г1алкхаш йоахкаш к1ормацех,
Б1арга синош дохкаш сеттадараш,
Сай наьшашца лавка т1а хул яг1а,
Дахар-денар дукхаг1а а дувцаш.

Эй, гаьвар дуне – со йоккха сага,
Театре яг1а еза хьалхишка!
Цигар кафе яг1ар деза дега,
Ц1ай дазхаде аз дувха бацкъашка!

Безам ба ха ви1и дезалашца,
Цига х1анза модах дар, из фуд ха!
Дицлуш къадана вахар, шерашца,
Къамаьлаш деш, цхьа самукъа яха.

Ког кога т1а булаш сай ло1ама,
Из йижар-г1аттар гу кино хьожаш.
Цхьанена а хетургдоацаш тема,
Со йоккхасаг хилар да сайна ловш!!

Хил безам ба са, айянна йоккхсаг,
Г1аж йоацаш бай ког лувзаш яха.
Тайпа-тайпара молхаш кхувсаш баг,
Ликёраца д1амол аз, сай маьха!

Сона-м халхар б1ал баккх ловра,
Боккхий наьх цига  хьегабе...
Цхьа Чечетка тохаш товра,
Луш мукъале кога бухьа!

Са-м дог дац къаянна йоккхсаг  хила,
Сай долча хьаькъалца хина!
Гаьвар дуне я1! Беце хьо бала?
Б1аьстен зиза дезар сона!

                26. 03 . 2021 ш.