Г1аьно лораеш мустафа ганижев

          Г1АЬНО ЛОРАЕШ              Мустафа Ганижев

Сихо яц, шортта 1уйренга хьожаш,
Ц1аг1а г1а* да, д1а-х1а лелаш хета.
Цига к1ай бос лепарго хьалувцаш,
Кхета моси гурматах хул гета**.

Г1а дар сага тарлуш саг йижача,
Ког боккхаш цо шортта, бийса тайна.
Г1а ма1сага тара дар тийнача,
Ерзан улл кхалсаг гуш хьожа къина.

Эхьдоацаш, мукъа т1ахьежар из г1а,
Цун баргашка б1айха ала а боагар.
Б1арга синца хьокхалуш из ч1оаг1а,
Малх 1аткъа ц1ока мара цун т1адацар.

Ерзан яр кхосалу сай мо кхераш,
Хьож из къайлабокха бийла накха.
Д1акъовла цо дег1 к1адаца могаш,
Н1абра цхьанена елакъаж т1аккха.

Юхь яр сирдаяьнна хоз безамца,
Яр из, шийна т1акхоачийташ атта.
Из еза кхалсаг гуш яр н1абарца,
Цу бийсан г1аьно лоръеш х1аьта!

Н1абар г1а дар кхалсага г1ойлена,
Цо бар бахьаш аьттув бола безам.
Г1а лийлар малайк мо сомадаьнна,
Йи1ий безам лорабе мог даим!
                Г1а*- сон; Гета** - лён.   
26. 02. 2021 ш.