***

ГЬАХЪ  ЖЕН!
(Веревирд)
К1анивални
Дак1анвал,
Къайивални
Масанвал,
Писвални,
Хъсанвал
Ийидай заз
Ава гьахъ!
Эгер тушт1а,
Зун нагахъ!


Миллетдин
Векил яз,
Гьич садрани,
Санани
Тухванач за
Сефил яз!
Заз зи миллет
Вири я!
Ам куьлуь ваъ,
Ири я!
Ам ажуз туш
Дири я!
Чи миллетдал
Ала т1вар,
Ава адан
Сан-кьадар.
Ава адаз
Пак т1варар-
Савад гайи
Марифар.
Ава адаз
Тарихар,
Тарих кхьей
Арифар!


Пехилбур
Заз дак1анда.
Къайибур заз
Заланда.
Пис ният гвайд
Душманда!
Чун к!аниди
Масанда.
Гъавурд авайд
Хъсанда,
За кьазва ам
Инсандай!


Уьмуьр
Гьардаз,
Я садра.
Садбур ава
Сувабра.
Садбур ава
Гьисабра.
Садбурни,
Ара-ара,
Руьхъ акур,
Ламра саягъ,
Ар ягъиз,
К1ур цавална
Къатадра…
Менсебдалай
Алухдиз
Къимет гуда
Махлукьди.
Низ вуч ят1а
Талукьди!
Гьар са касдихъ
Гала т1ул.
Т1улдиз килигай
Акьул!


Чаз чи дидед
Ч1ал ава.
Адан тартиб,
Гьал ава.
Гьахъни, нагьахъ
Чин тийиз,
Ст1уни хийир
 Гъин тийиз
Ч1ал патал чи,
Садбурун
Ният ч1уру,
Къал ава…
Ч1ал чи иер
Зиннет я!
Ч1алан иес
Миллет я!
Миллетдин
Векилдиз
Ч1ал чир тахьун
Зиллет я!
Ч1ал чи, нагагь,
Квахьайт1а,
Ч1ехи бубайрин
Ругьери,
Ийидайди
Лянет я!


Хъсан кар я,
Гьар садан,
Рик1е даим
Ватан хьун!
Ам диде кьван
Масан хьун!
Гьар са карда
Ам к1ан хьун.
Герек ч1авуз,
Дак1андаз,
Уьфтуьналди,
Кьве къван гун…
Гьелбеда хьи,
И  гьални,
Ватан патал,
Са т1имил кьван,
Жеда хьи ви
Рик1-чан кун!


Ватан хьанва
Кьве патан.
Фенва юкьвай
Вац1 Кьулан.
Кьулан хьунал
Я пашман:
Кьве патани
Чун аслуди
Хьанва кьве
Пачагьлухдиз.
Пайна, гьич
Садран такур,
Цацун симери
Хуьр, убани,
Сувни, тамни,
Вац1ни къур
Тухванва
Кьет1и часпар!
Халкь авунва
Татабар,
Халкьдиз гузва
Азабар!


К1андач заз
Къал хьана.
Рекьер,
Муькъвер
Сал хьана.
(Вичиз талукь
Т1уьн течиз,
Кьве т1уналлай
Мал хьана).
Вах стхадикай,
Къакъатна,
Мукьва-кьили
Яргъал хьана,
Халкьдин рик1е
Т1ал хьана.


Чил паталди,
Тир наши,
Ийизвайда
Чаз буьгьуь,
Ягъна хьиз
Жуван уьгьуь,
Маймахдиз
Жаваб це,
Адан рик1из
Азаб це!
Чир хьурай хьи
Чи  чилер
Муьт1уьгъ  хьунал
Тефейди.
Каш  акур
Ягъид вилер,
Чапрас хьана
Хъифейди…
Гьахъ, тарихди,
Кхьейди!


Чун я чи
Арха-далу.
Хьанват1ани
Чун аслу.
Хьайиди туш,
Я хьанач
Чи миллет
 К1ани халу!
Хьанайт1а,
Чун пайдачир,
Кьулан вац1ун
Кьве кьерал
Чим акъудиз
Ц1айдачир!
Гьар са куьниз
Вахт ава,
Вахтунизни
Бахт ава…


Асул макъсад
Сад хьана,
Сад муькуьдан
Пад хьана,
Вафалу яз,
Рик1ни куз,
Ватанперес
Хьиз тухуз,
Гьар са карда
Куьмек гуз,
Къайивални,
Дак1анвал,
Пехилвални,
Душманвал
Квай гьаларал,
Тахьана  кис,
 Ийидайвал
Вирида гьис,
Эцигна
Канда эхир,
Авуна хьиз
Хъсанз фикир!
Чун патал
Нагьахъ тежен,
Са миллет хьиз,
Чун гьахъ жен!

2017й.