***

ЗИ  Ч1АЛ

Вун авайвиляй
и дуьняда
зи къадим, сур ч1ал,

Дидедиз зун
хьанвайди  я
вун чирун патал.

Дидед къужах,
буйдал гъиз,
хьана чими к1вал.

Секин хвена,
туьмер ийиз,
игисна хурал.

Бубади заз,
гишир алай,
гьазурна пак кьеб.

Кьеб юкьваз,
заз килигиз,
хъуьрез хьана чеб.

Диде хьанай 
япал ийиз
тавазрин куш-куш.

Лайлаярни
лугьуз хьана
милайим ва хуш.

Таза чагъдиз
тавазвилер               
ийиз давамар,

Герен-герен
лугьуз хьана
мани - макьамар.

Сес акъудиз,
ван чк1уриз
хьана зун векъи.

Капу фена,
Хур алукьиз,
Нини хьиз биц1и.

Кьеп1иникай
азадна зун,
аял хьиз бегьем.

Тухарна  заз,
ц1игел такваз,
хайи к1валин дем...

Галчукна зал
пуд п1ип1на шал,
кьуна зун  к1ула.

Къекъуьрна зун,
гелкъведайла,               
багъдани сала.

Гъен къалурна,
кар къалурна,
акуна к1валин къав...

Фу чразвай
хьар къалурна,
ацукьна патав.

Там акуна,
к1ам акуна
маканда авай.

Дагъ акуна
вац1 акуна,
ватанда авай...

Вун захъ галаз,-
санал хьана,
рахаз ва хъуьрез,

Вун паталди,
алахъна зун
хуьз мизан-терез.

Амукьнач заз
дерин, даяз,..
чи гафарин сир.

Чир хьана заз
 медени рахаз,
 луьк1уьнин хас тир.

Зи ч1ехи ч1ал -
Зи Лезги ч1ал,
Чир хьун зи
къаст тир!

Заз, диде хьиз,
адан сес хьиз               
Вунни заз
 пак тир.

Хьанва ч1ехи,
кьил  я  рехи,
яш  хьанва
пудкъад.
.
Анжах вуна,
зи уьмуьрдиз,               
ганва
 верци дад!
2012 й.