БАГЪРИ ЧIАЛ
(Мяъли)
Дадайи никкси тувнайи
Шараб ва аман - багъри чIал,
Яраб деврариъ дуфнайи
ХьидикIана яв рюгь мичIал?
Жара чIалар гъудургъдариз
ШуйкIан багъри чIалнакан гъагъ?
Яркьу рякъюз удучIвдариз
Дидкан шуйкIан ярхла жилгъа?
Йиз кIваъ урзри, кIалбиъ гъиву
Ширин мяълийир бейнава,
Йитимар кIуру ччвур туву,
ШуйкIан яраб уьмриъ ява?
Тувуз дархьи веледдихьна
Бабан аманат - багъри чIал,
Яраб, узу гъяру вахтна,
ХьидикIан узухъди мичIал?
Жара чIалар гъудургъдариз
ШуйкIан багъри чIалнакан гъагъ?
Яркьу рякъюз удучIвдариз
Яраб дидкан шуйкIан жилгъа?
Веледарси кIваин алди
Уьмриз гьау мяълийир йиз,
Бабан чIал аьгъюр имдарди,
ГьархуйкIана гъюру наслиз?!
ГьархдикIана гъюру наслиз?!
*Шикил гъизигур художник Мягьямед Мурадов ву.
Родной язык - Багъри чIал Мяъли
© Copyright: Эльмира Ашурбекова, 2021
Свидетельство о публикации №121021200945
Свидетельство о публикации №121021200945
Рецензии