***

ХЬАНВАЧ   БЕГЬЕМ

Вилик ква зи  хара чарар.   
Ц1велекни ква, гъуд кьуна, гъил.
Уьмуьрдикай кхьей ч1алар               
К1елиз, чешмегдик ква кьве  вил.               
Девит куьтягь тахьай къелем,
Зи ч1ал гьеле хьанвач бегьем!


Ч1ехи хьана патав Кьулан,
Япараваз авазрин ван.
Йисар тир чеб гьакьван хъсан,               
Къайгъу течир, аял ч1аван.            
Девит куьтягь тахьай къелем,
Зи ч1ал гьеле хьанвач бегьем!


Ц1ерид йисан хьана жегьил,
Кьат1ун, фагьум тирт1ан хъуьтуьл,
Лепейрикди ийизвай кьуьл
Гьуьл хьиз авай, циц1и гуьгьуьл.
Девит куьтягь тахьай къелем,
Зи ч1ал гьеле хьанвач бегьем!


Ашкъи хьана, чунбурдин цаз
Галук1ай хьиз, к1иринив кьаз.
К1анивилин ялавдик кваз
Мугьуббатдин  гишир храз.
Девит куьтягь тахьай къелем,
Зи ч1ал гьеле хьанвач бегьем!


Хайи чил, ч1ал хьана масан,
Эцигна хьиз кьве къатан чан,
Ч1ал кихьена  ийидай ван, -               
 Раижна за ватан жуван.
Девит куьтягь тахьай къелем,
Зи ч1ал гьеле хьанвач бегьем!


Бубайри  тур хъсан девран,
Квадар тийиз алахънатан,
Нягьс пачагьди, хьайи душман,
Терг авуна, кьур хьиз дуван…
Девит куьтягь тахьай къелем,
Зи ч1ал гьеле хьанвач бегьем!


Талукь азад ял - гьава гур
Зи хайи чил,  кьве пай авур,       
Цацар алай, часпар гавур               
Пайда хьана, садран такур… 
Девит куьтягь тахьай къелем,
Зи ч1ал гьеле хьнвач бегьем!


Кьве уьлкведи, кьуна гьисаб,
Къакъудна халкь, авай кьве гъаб.
Алагъ-салагъ хьанва татаб…
Гьалдал  гъанва тагудай таб.
Девит куьтягь тахьай къелем,
Зи ч1ал гьеле хьанвач бегьем.
 

Гъилик кваз ц1вел, гагьни кьаз пел,
Чарар, са-са, авуна к1ел.
Тунвай магьид къелемди гел.
Чешне патал, чеб тир эфзел.
Девит куьтягь тахьай къелем,
Зи ч1ал гьеле хьанвач бегьем!


Кьве девир заз хьана кьисмет:
Сад алатна – аваз гьуьрмет.
Муькуьдаз за гузвай къимет:
- Девир, къалум хьуй ваз фелек…
Девит куьтягь тахьай къелем,
Зи ч1ал гьеле хьанвач бегьем!


Уьмуьрдикай,  яш зи агьил,-
Кьуьзуьвилихъ хьанвай майил.
Ч1алар кхьиз, зун яз къабил,
Хъижеда мад, гьалда табдил.
Девит куьтягь тахьай къелем,
Зи ч1ал гьеле хьанвач бегьем!


 Чизва., са(ю)къуз, чкадалкьван
 Агакьда зи уьмуьрд карван.
 Тамамарда, гьанал жуван,
 Кхьиз хьайи  ч1аларин сан,               
 Девит куьтягьда на къелем,
 Зи  ч1ал-кхьин жеда бегьем!

2020. 09.