***

ВИ  ДЕРДИНА   
 
(вафалувал)

Заз акурла  вун гьа садра,
Мус ахкурай заз вун мадра
Лугьуз,  гьатнай зун гьисабра.
Ви дердина, ви дердина.

Кьилел буьшме, кварни къуьне,            
Вун авайла булахд рекье               
Рахаз к1андай сагеренд къене.            
Ви дердина, ви дердина.   

Гевилда жез гьа са суал:
Яраб, ам заз яр жеда жал?
Гагь гиман физ,  гагьни шак гьал.   
Ви дердина, ви дердина.

К1валин пип1е  мет1ел дафтар,
Ц1иргъина тваз рик1ин гафар,
Кхьиз хьана бахш квай ч1алар
Ви дердина, ви дердина.

Кьабулайла на  разивал,
Захъ хъхьанач мад сефил гьал.
Секин хьанай рик1ик квай къал.               
Ви дердина, ви дердина.

Къачун патал къизил зак1ал,
Гарданда хьун патал гьакал,
Ат1анай за мензил яргъал.
Ви дердина, ви дердина.

Адет хвена хьана мехъер:
Кьуланфералд пуд къуз демер,
Къаварал за курна шемер.
Ви дердина, ви дердина.

Чи уьмуьрдин шегьре рехъ ленг
Тахьун патал, тухвана женг.
Асайиш, къул  авуна генг,
Ви дердина,  ви дердина.

Мугьуббатдин вафалу, пак
Эгьтер хвена чун патал гьахъ,
Ихтибардал текъвервал шак.
Ви дердина,  ви дердина.

Къе уьмуьрди яш ганват1ан,
Татаб, тентес  хас хьанват1ан,    .      
Къайгъудама зун гьар йикъан               
Ви дердина , ви дердина.

Халисан т1вар я ви Аяр,
Амма эаз  вун – Первердигар!
Гьар камуна за кьаз и т1вар
Гьисзава жув яз бахтавар. 
Ви дердина, ви дердина!
               
 2018 й.