Сумчриз теклиф

        (махъв)
Йигъарикан сад йигъан
Саб ужуб хьадан йигъан,
Шули айиган лавлан
Абхънийи шаду фигъан.
Ярквраъ теклиф варидиз
ГъапIу гъюру чан сумчриз.
Гарали гъюб гьялакди,
Уьру ботинкйир алди,
Ахьну сумкайиъ кьутIар,
Зиин кила гъяфатар,
УдубчIвуру чан мукь’ан.
Хъа чIат… Пагь! Аьхир заман!
ЦIа гъюра завариан.
Дюрхну ккун, гъапи, улар
Мукьан яман ригъдихьан.
УлукIуз мучIу аьйнар
Хъадабку кьяляхъ сабан.

Алахьну аьйнар уткан
УдубчIву хъана мукь’ан.
АпIури бегьем фурсар,
Амма тIаъси чан урчIар,
Либгур - ригъ рябкъюрамдар,
Чиг убгъура, гъя дифар
Рякъяриъ духьна батIрар.
Яни, зат хьад даршиси
Табиаьтра а чвнуси....

Гарали гъюб хътабкуру,
Чекмийир алахьуру.
«Мархьлихьан гьич гучI адар!»-
Гъапи, арццайиз урчIар.
Амма лик йифуъ абсру
«Я эллер, гьамус гьапIру?»
Жандак гъабгъу аязну,
Ккунду кьяляхъ хъадабкну…
Мициб аьхъюсиб йигъан      
Хъабхьну ккун мани ургам.

Алахьну мани палтар,
Хъасинган хьайин атIнар,
Кабалгну, шлуси гьяйран,
Хъана удубчIву мукь’ан.
Амма кидирчу улар.
ЧIатариъ зат йиф имдар.
Ачухъ духьнайи завар,
Дуфнайиси хьадукар.
Гарали гъюб шул гьигьлан,
Рубзури а амкI унтIлан.
Яманди гъабхьи русвагь-   
«ГьапIуйкIан, я жан Аллагь?»
Хътруркьиш узу му сумчриз,
Фу кIур дидин эйсийиз?
Аьлхъюру маил-мадат,
ДарапIиш пулин аьдат.

ЦIиб гъабшиган юкIв фаркьат,
Дишла дапIну гьяракат,
Алахьуру чекмийир.
Гъадагъну аьйнар, четир,
Цалик кибхну чан ургам,
Хъасин рякъ апIур давам…
Гарали гъюб дириди,
Гъябгъюр шлубкьан гьялакди.
Хъубкьну магьа гъюрахьна,
Гъюран мукьан багахьна.
Дуфнайиси дар хялар,
Я мукьмарин дих адар,
Я рякъюрадар ялхънар.
Кучру раккнарик гъюран,
Хъа дих ебхьуру мукь’ан:
«Адашна дада адар,
Раккнар тIауз хай шулдар,
Вуча учу бицIидар».
Гьамцдар гъахьнийи ляхнар…

           ***
Теклиф дапIну аш сумчриз,
Кьан дарапIди гъач дидиз!
Махъв вушра учв зарафат,
Гьарсаб ляхниз а чан вахт.